Baspasóz májilisine Energetıka mınıstrligi janyndaǵy Qoǵamdyq keńestiń ekologııa jónindegi komıssııa jetekshisi Saltanat Rahymbekova, «Led System Media» JShS dırektory Amangeldi Taýkenov, tehnıkalyq ǵylymdar doktory Baıandy Dıhanbaev qatysyp, kórmede usynylǵan jobalar, olardyń bizdiń elge tıgizer paıdasy jóninde aıtyp berdi.
EKSPO-2017 kórmesin ótkizý álemniń eń úzdik tehnologııalaryn shoǵyrlandyrýǵa, sondaı-aq otandyq ǵylymnyń áleýetin ashýǵa septigin tıgizdi deıdi mamandar. Bul rette energııa únemdeý jáne energııa tıimdiligin arttyrý salasynda belgilengen strategııalyq mindetter tıimdi memlekettik saıasatty aıqyndap, qajetti sharalardy qabyldaýǵa múmkindik berdi.
Saltanat Rahymbekovanyń aıtýynsha, EKSPO-dan keıingi kezeńde elimizde energııa tıimdiligin arttyrý baǵytyndaǵy keshendi sharalar jalǵasyn tappaq.
Birinshiden, ekonomıkanyń túrli salalarynyń energııa tıimdiligin arttyrý jáne IJО́-degi energııa syıymdylyǵyn tómendetý úshin otandyq «jasyl» tehnologııalar men ınnovasııalardyń tizimin qurý qolǵa alynady.
Ekinshiden, otandyq ǵylymǵa qoldaý kórsetý jáne olardyń jobalaryn kommersııalandyrýǵa yqpal etý baǵytynda jumys júrgiziledi. Básekege qabiletti jáne kommersııalyq turǵydan keleshegi bar ǵylymı jobalardy izdestirý jáne ilgeriletý maqsatynda Qoǵamdyq kommersııalandyrý keńsesiniń jumysy jandandyrylady.
Úshinshiden, bıýdjetten tys ınvestısııalardy tartý tetikterin ázirleýge yqpal etý jaǵy qolǵa alynady. Bul rette bes ınstıtýttyq reformany júzege asyrý jónindegi «100 naqty qadam» Ult josparynda Memleket basshysy halyqaralyq moıyndalǵan energoservıstik kelisimsharttar arqyly energııa únemdeý salasyna strategııalyq ınvestorlardy tartý boıynsha mindetter qoıǵanyn aıta ketken jón. Tórtinshiden, elimizde «jasyl» ekonomıkany damytýǵa múddeli barlyq tarap úshin aqparattyq ınfraqurylym qurý jáne yntalandyrý quraldaryn tabý jolǵa qoıylǵan.
Al óz kezeginde «Led System Media» JShS dırektory Amangeldi Taýkenov EKSPO-2017 kórmesi aıasynda kompanııa elektr energııasyn únemdeıtin jaryq-dıodty shamdar óndirisin tanystyrǵanyn, olardyń kósheler men saıabaqtarǵa arnalǵanyn atap ótti.
«Shamdar beınebaqylaý jáne jarylǵysh zattardy anyqtaý júıelerimen jabdyqtalǵan. Bul jobany jasaýǵa birneshe jyl ketti. Atalǵan shamdarǵa qaýipsizdikti qamtamasyz etýmen aınalysatyn kóptegen organdar qyzyǵýshylyq tanytyp otyr. Endi biz bul jobany tájirıbe júzinde paıdalanyp kórmekpiz. Astana qalasynda Smart city tehnologııasy boıynsha saıabaqtar men mektepterdiń mańynda jáne taǵy basqa jerlerde qoldanyp kórýimiz múmkin», dedi «Led System Media» JShS dırektory. Bul kompanııa búginde jylyjaılarǵa arnalǵan enegetıkalyq tıimdiligi mol, arnaıy shamdar jasaýdy da qolǵa alǵan eken.
«Búgingi kúni Qazaqstanda jan basyna shaqqandaǵy elektr energııasyn tutyný kólemi shamamen saǵatyna 4900 kılovatty quraıdy. Bul kez kelgen Ortalyq Azııa elindegi kórsetkishten shamamen eki esege, álemniń basqa damýshy elderinen 3,5 esege kóp. О́tken jyly barlyq tutynylǵan elektr energııa – 92 mlrd kılovatt saǵattyń 22 paıyzy ǵımarattarǵa, 9,3 paıyzy kommýnaldyq sektorǵa, 8 paıyzy qyzmet kórsetý sektoryna, 5 paıyzy memlekettik sektorǵa, al 12-13 paıyzy jaryqtandyrýǵa tıesili boldy. 2050 jylǵa deıingi damý strategııasyna sáıkes, búkil elektr energııanyń 50 paıyzy jańǵyrmaly energııa kózderinen óndirilýi tıis», dedi Amangeldi Taýkenov.
Dınara BITIK,
«Egemen Qazaqstan»
