Bir aıta keterligi, ótken aıda Saýd Arabııasynyń táýelsizdik kúnine oraı ótken fýtbol matchyn tamashalaýǵa Er-Rııadtaǵy stadıonǵa áıelder de kirgizilgen bolatyn. Al endi kelesi jyldan bastap barlyq áıelder sport oıyndaryn stadıonnan tamashalaı alady. Saýd Arabııasynyń sport organy ázirge daıyndyq Er-Rııad, Djıdda jáne Dammam qalalaryndaǵy eń iri úsh stadıonda bastalatynyn aıtty. Qajetti ınfraqurylymdardy engizý jumystary 2018 jyly aıaqtalady dep josparlanyp otyr.
Saýd Arabııasynyń hanzadasy Mohammed bın Salman koroldik burynǵydaı barlyq dinge túsinistikpen qaraıtyn memleketke aınalý kerek dep esepteıdi. Dál osy maqsatpen 2 jyl buryn Vision 2030 baǵdarlamasy qabyldanǵan bolatyn. Baǵdarlama boıynsha jastar men áıelderdiń múmkindikteri men quqyqtaryn arttyrý basty nazarǵa alynǵan. Sonymen qatar baǵdarlama ekonomıkanyń munaıǵa táýeldiliginen bas tartyp, eńbek naryǵyna jastar men áıelderdi kóptep tartýdy kózdep otyr.
Negizi Saýd Arabııasyndaǵy júıe boıynsha áıelder oqýǵa túsý, jol júrý úshin ákesiniń, aǵasynyń nemese kúıeýiniń ruqsatyn alýy kerek. Endigi damý baǵdarlamasynda keıbir normalar jeńildetilgen. Tipti, ıslamnyń qatań qadaǵalanaýyn baqylap, keıde qatygezdikke baratyn dinı polısııanyń da múmkindikteri shektelip, olar úlken qalalarda azaıǵan. Esterińizde bolsa, qoǵamdy jańǵyrtý baǵdarlamasy boıynsha ótken aıda áıelderge kólik júrgizýge ruqsat berilgen bolatyn.
Degenmen, bul reformalarǵa qarsy pikir bildirýshiler qatary da kún sanap artyp keledi. Áleýmettik jelilerde «Aldymen áıelderge kólik júrgizýge ruqsat berildi. Endi stadıondar. Ary qaraı ne bolady?» dep jazýshylar qatary kóp. Biraq sarapshylar reformalarǵa qarsy konservatıvti ortanyń keri reaksııasy bolatynyn aldyn ala boljaǵan bolatyn. «Batyl sheshimderge qaramastan, 1970 jyldan beri kele jatqan konservatıvti kózqarastyń basymdyǵyn az ýaqytta joıý múmkin emes. Ýltrakonservatıvti jáne radıkaldy elementter jańa bastamalaraǵa qaýip tóndire beredi", deıdi Eurasia Group analıtıkalyq kompanııa mamandary.
Gúlnur Qýanyshbekqyzy,
"Egemen Qazaqstan"
