Saltanatty is-sharanyń basty maqsaty – Elbasynyń bastamalaryn, naqtyraq aıtqanda «Sıfrlyq Qazaqstan-2020» baǵdarlamasyn júzege asyrý men damytýǵa úles qosý, sondaı-aq, jastardyń qoǵamdaǵy belsendiligin arttyrý.
Alqaly basqosýǵa Din isteri jáne azamattyq qoǵam mınıstri Nurlan Ermekbaev, «Bolashaq» Qaýymdastyǵy Keńesiniń tóraǵasy mindetin atqarýshy Baqtııar Máken, Bilim jáne ǵylym mınıstrliginiń jaýapty hatshysy Aryn Orsarıev, Reseıdegi «Sınergııa» bıznes-mektebiniń Qazaqstandaǵy bóliminiń dırektory Baýyrjan Qasymbergebaev jáne ózge de tulǵalar qatysty.
Festıvaldiń ashylýynda sóz alǵan Din isteri jáne azamattyq qoǵam mınıstri Nurlan Ermekbaev jastarǵa ásirese kásipkerler tarapy kóbirek qoldaý kórsetý kerektigin usyndy.
– Memleket basshysy: «Qazirgi tańda jeke adam ǵana emes, tutas halyqtyń ózi básekelik qabiletin arttyrsa ǵana tabysqa jetýge múmkindik alady», dep erekshe aıtyp ótken. Osy joba arqyly biz shyǵarmashyl jastarǵa qoldaý kórsetip, olardyń ınnovasııalyq áleýetin damytý úshin alań qurǵymyz keledi. Búgin men bıznes-qaýymdastyqty jastar kásipkerligin qoldaýǵa shaqyramyn, – dedi mınıstr Nurlan Ermekbaev.
Jıynǵa elimizdiń túkpir-túkpirinen ınnovasııalyq ıdeıalary bar talantty 500 jas qatysty. Al baıandamashylar «IT tehnologııalar», «Medısına», «Qaldyqtardy paıdaǵa jaratý», «Aýyl sharýashylyǵy», «Energetıka», «Qyzmet kórsetý salasy», «Aqyldy tehnologııalar», «Innovasııalar» sekildi segiz baǵytta óz oılaryn, ıdeıalaryn bildirdi.
Is-sharaǵa elimizdiń úzdik bıznesmenderi, túrli saladaǵy mamandar shaqyryldy. Olar ózderiniń tájirıbelerimen, bilimderimen bólisti. Sonymen qatar túrli bıznes-oıyndar uıymdastyryldy.
Qatysýshylar tarapynan 100-den astam ınnovasııalyq ıdeıa kelip tústi. Olardyń 27-i ǵana fınaldyq kezeńge jetti.
Qaraǵandylyq Vıacheslav Lıtvınov «Caste Exoskeleton. Reabılıtasııalyq tehnıka» jobasymen festıvaldiń jeńimpazy atandy. Ol Máskeý qalasynda Plehanov atyndaǵy Inkýbatorda tegin oqý sertıfıkatyna ıelendi.
Almaty qalasynan kelgen Aıbek Rahym, Ersultan Nalıhan, Elnur Jeksenov «Tazalyk» jobasyn usynyp ekinshi oryn aldy. Al Astana qalasynan Damır Taǵambaev «Ekokorm» jobasy arqyly úzdik úshtikti qorytyndylady.
Sondaı-aq festıvaldiń jeńimpazdary men júldegerleri «Synergy Global Forum Almaty 2017» halyqaralyq forýmyna qatysýǵa shaqyrylady.
Aıan ÁBDÝÁLI,
«Egemen Qazaqstan»
