Dóńgelek ústel barysynda «Rýhanı jańǵyrý» baǵdarlamasynyń jalpyulttyq alty negizgi jobalarynyń biri sanalatyn «Týǵan jer» jobasynyń Almaty qalasynda júzege asyrylý barysy talqylandy.
Ǵalymdar, saıasattanýshylar, ǵylymı sarapshylyq qoǵamdastyqtyń, saıası partııalardyń, etnomádenı birlestikterdiń, úkimettik emes uıymdardyń jáne jastar uıymdarynyń ókilderi men stýdentter qatysqan is-sharada Almaty qalasy Ishki saıasat basqarmasynyń basshysy Nurlan Sydyqov, Eýrazııalyq ıntegrasııa ınstıtýty dırektorynyń orynbasary Natalıa Kalashnıkova, Almaty qalasyndaǵy «Rýhanı jańǵyrý» jobalyq keńsesiniń basshysy Gúlnár Qońyrova, Sh.Ýálıhanov atyndaǵy Tarıh jáne etnologııa ınstıtýtynyń professory, tarıh ǵylymdarynyń doktory Ahmet Toqtabaı, Sorbonna-Qazaqstan ınstıtýtynyń Halyqaralyq qatynastar kafedrasynyń meńgerýshisi, professor, saıası ǵylymdar doktory Jomart Sımtıkov, «Barbang» kúrdter qaýymdastyǵynyń prezıdenti Knıaz Mırzoev, «Abaı-aqparat» qoǵamdyq qorynyń vıse-prezıdenti Aıdos Sarym, Bilim jáne ǵylym mınıstrligi Ǵylym komıtetiniń Fılosofııa, saıasattaný jáne dintaný ınstıtýty dırektorynyń orynbasary, fılologııa ǵylymdarynyń doktory, professor Serik Nurmuratov syndy zııaly qaýym ókilderi men qoǵam belsendileri óz oılary men usynystaryn ortaǵa saldy.
Jıyn barysynda sóz alǵan Eýrazııalyq ıntegrasııa ınstıtýty dırektorynyń orynbasary Natalıa Kalashnıkova atalmysh ınstıtýt júrgizip jatqan «Rýhanı jańǵyrý» baǵdarlamasyn talqylaý boıynsha sarapshylyq kezdesýler óńirlik erekshelikterdi eskere otyryp, baǵdarlamanyń iske asyrylý barysy týraly sarapshylardyń, jurtshylyqtyń pikirin jınaqtap-qorytýǵa múmkindik bergenin, buǵan deıin respýblıkalyq jáne óńirlik deńgeıde osyndaı 8 kezdesýdiń ótkenin atap ótti. «Baǵdarlamanyń túp negizi – el Prezıdenti usynǵan 6 jobany iske asyrý arqyly qoǵamdy jigerli jańǵyrý jolyna túsirý. Atalmysh alty joba – qoǵam alǵa damýynyń negizgi kúshteri bolmaq. Baǵdarlamanyń ózi qoǵamdyq sanamyzdy, dástúrlerdi, qundylyqtardy, ortaq tarıh pen tarıhı jadty eskere otyryp, qalyptastyrý isinde qazaqstandyq brendke aınalyp otyr. Osy turǵydan alǵanda, «Týǵan jer» jobasynyń zııaly elıta kóp shoǵyrlanǵan Almatyda da iske asyrylýy týǵan elimizdiń ımıdjin nyǵaıtýǵa, óz qalamyzǵa, elimizge degen mahabbatty arttyrýǵa, jańa múmkindikter kóziniń ashylýyna oń áserin tıgizetini anyq. «Rýhanı jańǵyrý» jobalaryn iske asyrýǵa árbir qazaqstandyq azamat belsene atsalyssa, ulttyq sananyń nyǵaıa túsetini kámil», dedi Natalıa Pavlovna.
«Rýhanı jańǵyrý» baǵdarlamasynyń negizgi alty baǵyttaǵy jobalaryn iske asyrý boıynsha elimizdiń ár óńirinde qurylǵan jobalyq keńseler qatarynda Almaty qalasy jobalyq keńsesi ashylǵany belgili. Almatylyq jobalyq keńse basshysy Gúlnár Qońyrova «Týǵan jer» arnaıy jobasynyń iske asyrylýy týraly baıandamasynda atalmysh mekemeniń basty jumystarynyń biri – el arasynda «Rýhanı jańǵyrý» baǵdarlamasyn júzege asyrý tetikterine qatysty túsindirme jumystary júrgiziletinin atap ótti. Keńes quramyna Almaty qalasy ákimdiginiń 15 qurylymdyq jáne vedomstvoaralyq bólimsheleriniń ókilderi jobalyq ádistemelerdi damyta otyryp, olardyń durys júrgizilýin baqylap, jobalyq basqarma jumystaryna qadaǵalaý jasaıtynyn jetkizgen Gúlnár Qalelqyzy: «125 jobadan turatyn reestr men 87,4 mlrd teńgeden astam qarjyny quraıtyn is-sharalar tizimi bekitildi. Olardyń ishinde, 900 myńǵa jýyq adam qatysqan 50 is-shara oıdaǵydaı júrgizildi. «Rýhanı jańǵyrý» qoǵamdyq sanany qaıta jańǵyrtý baǵdarlamasynyń negizgi bólimi bolyp tabylatyn «Týǵan jer» baǵdarlamasy qaladaǵy bilim berý, ekologııa syndy keń kólemdegi jumystarmen qatar, mádenı nysandardy, tarıhı eskertkishterdi qalpyna keltirý men jalpyulttyq patrıotızmdi qalyptastyrýǵa baǵyttalǵan aýqymdy isterdiń atqarylýyn qarastyryp otyr», dedi.
Dóńgelek ústel barysynda qaladaǵy áleýmettik nysandardy salýǵa áleýmettik-qaıyrymdylyq is-sharalar ótkizýge qoldaý kórsetip otyrǵan mesenattardyń arqasynda qala aýdandarynda birqatar mektepter men emhanalar, sporttyq nysandar, turǵyn úıler salynǵanyn, bul ıgi ister aldaǵy ýaqytta da jalǵasyn tabatynyn aıtyp ótken Almaty qalasy Ishki saıasat basqarmasynyń basshysy Nurlan Sydyqov 2017 jyl – Jastar jyly dep jarııalanǵanyn, soǵan baılanysty qarasha aıynyń sońynda megapolıste jastardyń jańa ıdeıalary men usynystarynyń ashyq alańy retinde Jastar sammıti ótkiziletinin jetkizdi.
Basqosý qatysýshylary «Rýhanı jańǵyrý» baǵdarlamasyn jan-jaqty talqylaý, usynystar ázirleý men sapaly túrde iske asyrý úshin osyndaı suhbat alańdary men sarapshylyq kezdesýlerdiń jumysy mańyzdy ekenin atap ótti.
Mıra BAIBEK,
«Egemen Qazaqstan»
ALMATY
