Mınıstrdiń aıtýynsha, elordanyń qarqyndy damýy, demografııalyq syıymdylyq, óńir halqy tyǵyzdyǵynyń ósýi, kóshi-qon aǵymy astananyń aglomerasııalyq damýynyń alǵyshartyn quraıdy. Astana aglomerasııasynyń aýmaǵyna Astana qalasy — aglomerasııa ózegi, 3 aýdan (Arshaly, Selınograd, Shortandy) jáne Aqmola oblysy Aqkól aýdanynyń 4 okrýgi kiredi. Aglomerasııaǵa barlyǵy 124 eldi meken jatady. Aglomerasııa halqynyń sany 2030 jylǵa qaraı 1,6 mln adamǵa deıin jetedi.
Qujatty ázirleýshiler kontrmagnıt qalalar men ındýstrııalyq aımaqtardy qurý Astanany halyq sany jaǵynan biraz «jeńildetip», syrtqy kóshi-qon aǵyndaryn ózine «tartýǵa» múmkindik beredi dep esepteıdi.
О́ndiris pen qajetti óndiristik ınfraqurylymnyń kontrmagnıt jáne seriktes eldi mekenderde shoǵyrlanýy ozyq qarqynmen ósip kele jatqan aýmaqtardy qalyptastyrýǵa múmkindik beredi, olar «Arshaly», «Tóńkeris» jáne «Jaınaq» ındýstrııalyq aımaqtary bolmaq, bul ónerkásip ónimi óndirisiniń 144%-ǵa ósýin qamtamasyz etedi.
Áleýetti kontrmagnıtter retinde Aqkól qalasy men Aqmol aýyly anyqtaldy. Olar ózek-qaladan qashyq ornalasqan jáne kóshi-qon aǵymdaryn ózine tartatyn jetkilikti resýrstary bar. Halyqtyń erkin qozǵalysy, ózektiń keleshegi bar ósim oryndarymen baılanysy negizgi magıstral joldardyń kómegimen qamtamasyz etilýi tıis.
2030 jylǵa qaraı aglomerasııa aýmaǵynda úsh ındýstrııalyq aımaq qurý arqyly Astana qalasynan iri ónerkásiptik kásiporyndardy shyǵarý usynylyp otyr, sondaı-aq jańadan qurylatyn ónerkásiptik kásiporyndardy ındýstrııalyq aımaqtarǵa ornalastyrý kózdelgen.
Salany ártaraptandyrý jáne qarqyndatý esebinen aýyl sharýashylyǵy ónimderin óndirý 170 %-ǵa ulǵaıady. Astana qalasynyń azyq-túlikke (unǵa, qaraqumyqqa, sútke, burshaq daqyldaryna, qus etine jáne t.b.) degen qajettiligi aglomerasııa aýmaǵy esebinen tolyq qamtamasyz etilmek.
Aglomerasııa ózeginiń beton, temir beton buıymdary, kirpish, qıyrshyq tas, metall konstrýksııalary, aǵash buıymdary sııaqty qurylys materıaldaryna degen qajettiligin aglomerasııa aýmaǵynda ornalasqan kásiporyndar tolyqtaı qamtamasyz etetin bolady.
«Astana — Býrabaı» jasyl dálizin qurý jáne ony tabıǵı orman alqaptarymen biriktirip, biryńǵaı ekojúıeni qamtamasyz etý kózdelgen.
«Saryarqa» gaz qubyrynyń qurylysy esebinen eldi mekenderdi odan ári gazdandyrý Astana qalasy men 30-ǵa jýyq eldi mekendi gazdandyrýǵa, sondaı-aq, ekologııalyq jaǵdaıdy jaqsartýǵa múmkindik beredi.
Budan ózge, aglomerasııanyń ekologııalyq jaǵdaıyn jaqsartý úshin I-II sanattaǵy lastaýshy kásiporyndardy Astanadan kóshirý usynylady.
«О́ńiraralyq shemanyń jobalaý usynystaryn iske asyrý aglomerasııa aýmaǵynda ońtaıly qonystandyrýǵa jáne ekonomıkalyq tyǵyzdyq pen óńirdiń tutyný tyǵyzdyǵyn arttyrýǵa yqpal etpek», — dep sózin túıindedi J. Qasymbek.
Elorda aglomerasııasyn odan ári damytý boıynsha pikirimen Astana ákimi Áset Isekeshev te bólisti.
Talqylaý qorytyndysyn shyǵara otyryp, Baqytjan Saǵyntaev barlyq jaýapty memlekettik organdarǵa jáne ákimdikterge atalǵan óńiraralyq shemanyń tıimdi jumysyn júrgizýdi tapsyrdy.
Úkimet Astana aglomerasııasyn aýmaqtyq damytýdyń óńiraralyq shemasyn biraýyzdan bekitti.
