«Ǵalymdar birneshe úlgidegi grafıkany tııanaqty talqydan ótkizdi. Sonyń nátıjesinde kóptegen usynystar eskerilip, apostroftar arqyly jasalǵan grafıkalyq nusqasy tıimdi dep tabyldy. Ǵalymdarmen bas qosqan Prezıdent latyn qarpine negizdelgen qazaq álipbıiniń sońǵy jobasy qyzý talqylanyp, qoǵam tarapynan qoldaý tapqanyn atap ótip, kóp uzamaı qazaq tili álipbıin kırıllısadan latyn grafıkasyna kóshirý týraly Jarlyqqa qol qoıdy. Atap aıtqanda, el azamattary, ásirese, jastar kúndelikti tájirıbede latyn grafıkasyn belsendi túrde nasıhattaı bastady. Endi memlekettik tildiń jańa álipbıi kezeń-kezeńmen engiziletin bolady. Bul baǵytta ne jasalady? Birinshi kezekte, Úkimet tarapynan qazaq tiliniń latyn grafıkasyn engizý boıynsha jumys toby qurylady», - dedi mınıstr Ortalyq kommýnıkasııalar qyzmetindegi baspasóz máslıhatynda.
Onyń sózine qaraǵanda orfografııalyq-lıngvıstıkalyq komıssııa da qurylady. Latyn grafıkasy negizinde jańa orfografııalyq erejeler men qazaq tiliniń úlken orfografııalyq sózdigi jasalady.
«Úshinshiden, normatıvtik-quqyqtyq bazany sáıkestendirý qajet. Osydan keıin oqý-ádistemelik, oqýlyq, kórkem jáne basqa da qajetti ádebıetterdi ázirleý men basyp shyǵarýǵa kirise alamyz», - dep túsindirdi A. Muhamedıuly.
Osy oraıda ol áleýmettik mańyzy bar ádebıetterdi shyǵarýǵa erekshe nazar aýdarylatynyn atap ótti.
«Árıne, jańa álipbıdi qoǵamda ári buqaralyq aqparat quraldarynda belsendi túrde alǵa jyljytý kerek. Munymen qosa, jańa qazaq álipbıiniń tildik ortasyn keńeıtý úshin jańa álipbıdi jarnama salasynda qoldaný jumystaryn bastaý qajet. Sonymen qatar arnaıy oqytatyn portal men mátinderdi avtomatty túrde latyn qarpine aýdarýdyń konverteri qurylýy kerek», - dedi mınıstr.
