Aımaq basshysy E.Toǵjanov aýylsharýashylyq salasynyń toǵyz aıyn qorytyndylap, alqaly jıyn ótkizip, aımaqta atqarylǵan jumystardyń esebin tyńdap, kásipkerlermen kezdesti. Mal sharýashylyǵyn ótken jylmen salystyrǵandanda óńirde ósim bar, ıaǵnı mal basy 12,5 paıyzǵa artqan. Máselen, byltyr (2016 jyl) 482 713 bolsa, bıyl (2017 jyl) 537 247 qurady. Kósh basynda Mańǵystaý men Beıneý aýdandary tur. Asyl tuqymdy mal sharýashylyǵy – sapaly da mol ónim óndirýdiń kózi. Qazirgi kúni Mańǵystaý oblysy boıynsha 36 asyl tuqymdy mal sharýashylyǵy sýbektisi tirkelgen. Dál osy saladaǵy taýaróndirýshilerdi memlekettik qoldaý aıasynda mal ónimdiligin arttyrýǵa oblys boıynsha 260 mln teńge sýbsıdııa qarjysy bólingen. Mal sharýashylyǵymen aınalysam degen azamattarǵa jan jaqty qoldaý kórsetilýde. Sol úshin múmkindikti múlt jibermeı, naqty is bastaý kerek dedi, Eraly Toǵjanov.
Sondaı-aq Birkken Arab Ámirlikterinen jylyna 2,5 mln bas qoıǵa suranys bar ekenin aıtty. Bul bizdiń eksporttyq áleýetimizdi arttyrýǵa jol ashatyn bolady. Sondyqtan barlyq shopandardy qoıdy kóp ósirýge shaqyrdy. Osy rette shopan kómekshilerine aı saıyn turaqty jalaqy berilip turatynyn málimdedi.
Búginde oblys boıynsha egistikpen aınalysatyn 120 sharýashylyq jáne 13593 úı sharýashylyqtary bar. Bıylǵy egin alqabynyń kólemi – 1100 ga (2016 j 941 ga). Sonymen qatar 27 jylyjaı kesheni jumys istep tur. Bul salada da memleket tarapynan 181 mln teńge sýbsıdııa bólingen. Aldaǵy ýaqytta aımaqtaǵy jylyjaılar men uńǵymalardyń sanyn arttyryp, jappaı tamshylap sýarý tehnologııasyna ótý kerektigi aıtyldy. Jıyn sońynda oblys ákimi bul kórsetkishtermen toqmeıilsýge bolmaıtynyn eskertip, egin jáne aýylsharýashylyq salasynda ónim óndiretin kásiporyndarǵa óndiris kólemin kóbeıtýdi tapsyrdy. Sonymen qatar, memlekettiń jeńildikterin paıdalana otyryp, jańa kásiporyndar ashý kerektigin atap ótti.
Gúlaıym ShYNTEMIRQYZY,
«Egemen Qazaqstan»
