1 qańtardan bastap Qazaqstanda yntymaqty zeınetaqy kólemi (eńbektik) 8 paıyzǵa, bazalyq zeınetaqy basqa da járdemaqy túrleri sııaqty 6 paıyzǵa ósedi. Sonymen birge, bazalyq zeınetaqyny taǵaıyndaýdyń ádisi ózgeredi. Máselen, búginde bazalyq zeınetaqy tólemderi eńbek ótili esepke alynbaı barlyǵyna birdeı berilip kelse, 2018 jyldyń 1 shildesinen bastap eńbek ótiline qaraı eseptelip bólinetin bolady.
Svetlana Jaqypovanyń aıtýynsha, jınaqtaýshy zeınetaqy qoryna jınalǵan zeınetaqy jarnasyn eskere otyryp, 1998 jyldyń 1 qańtaryna deıingi de, 1998 jyldyń 1 qańtarynan keıingi de eńbek ótili esepke alynady.
«Mysal úshin, eger azamat keler jyly zeınetkerlikke shyǵady delik. Onyń 1998 jyldyń 1 qańtaryna deıingi yntymaqty zeınetaqy júıesindegi eńbek ótili 20 jyl bolyp, 15 jyl boıy zeınetaqy jınaqtaý qoryna úzilissiz zeınetaqy jarnasyn tólep keldi. Osylaısha, onyń jıyntyq eńbek ótili 35 jylǵa teń bolady. Jańa júıe ádisine saı, eger eńbek ótili 10 jyldan kem bolǵan jaǵdaıda, eń tómengi kúnkóris deńgeıinen 54 paıyz taǵaıyndalady. Bul soma keler jyly – 15274 teńge.
Eńbek ótili 10 jyldan asatyn bolsa, ár jyl úshin 2 paıyz ústeme qosylady. Eger joǵarydaǵy mysalda keltirilgendeı, jalpy eńbek ótili 35 jyl bolatyn bolsa, bazalyq zeınetaqy mólsheri eń tómengi ómir súrý deńgeıiniń 100 paıyz kóleminde, eger eńbek ótili 20 jyl bolatyn bolsa, eń tómengi ómir súrý deńgeıiniń 74 paıyz kóleminde taǵaıyndalady», - dedi vıse-mınıstr.
Dál qazir elimizde bazalyq zeınetaqy alatyn 2 mln 139 myń adam bar. Olardyń 44,1 paıyzynyń bazalyq zeınetaqysy eki esege kóteriletin bolady. Bul degenińiz, búginde zeınerkerler 14 466 myń teńge alatyn bolsa, 1 shildeden – 28 274 teńge zeınetaqy alady.
Atalǵan shara eńbek ótili kóp bola tura, az zeınetaqy alyp kelgen zeınetkerlerdiń zeınetaqysyn aıtarlyqtaı joǵarylatyp, áleýmettik ádilettilikti ornatady.
