Elbasy N.Nazarbaev 27 qazan kúni latyn grafıkasyna negizdelgen jańa qazaq tili álipbıin bekitkeni belgili. Sonyń negizinde Úkimetke jańa grafıkaǵa kóshirý jónindegi ulttyq komıssııa qurý tapsyryldy. Sonymen birge jańa qazaq tili álipbıiniń latyn grafıkasyna kóshýi 2025 jylǵa deıin kezeń-kezeńmen júrgiziletindigi atap kórsetildi.
Jıyn barysynda Mádenıet jáne sport mınıstri Arystanbek Muhamedıuly Elbasynyń «Qazaq tili álipbıin kırıllısadan latyn grafıkasyna kóshirý týraly» Jarlyqqa qol qoıylýyna baılanysty, tómendegi jobalar júzege asyryla bastaıtynyn atap ótti.
«Birinshiden, Úkimet janynan latyn grafıkasyn qazaq tiline endirý jónindegi jumys toby qurylady.
Ekinshiden, sol grafıkanyń emle-erejelerin jasaıtyn orfografııalyq-lıngvıstıkalyq komıssııany qurý. Latyn álipbıiniń negizinde jańa Orfografııalyq erejelerdi jáne qazaq tiliniń jańa orfografııalyq sózdikteri ázirlenedi. Latyn álipbıiniń negizinde «Qazaq tiliniń úlken orfografııalyq sózdigi» ázirlenip, shyǵarylady.
Úshinshiden, barlyq normatıvtik-quqyqtyq baza retke keltirilýi qajet. Sodan soń oqý-ádistemelik, kórkem jáne basqa da qajetti ádebıetterdi daıyndaý jáne olardy halyqqa taratý, ǵylymı-ádistemelik jumystary júrgiziledi. Sonymen qatar álipbıdi qoǵamdyq oryndarda jáne óńirlerde nasıhattaý jumystary qolǵa alynyp, BAQ salasynda birqatar jumystar atqarylýy tıis. Jarnamalyq jumystardy jandandyrý kerek. Arnaıy portal jáne mátinderdi latyn grafıkasyna avtomatty túrde kóshiretin konverter ázirlep iske qosylady», dedi A.Muhamedıuly.
A.Baıtursynov atyndaǵy Til bilimi ınstıtýtynyń dırektory Erden Qajybek qazir elimizde latyn álipbıine kóshý úshin synaq merzimi júrip jatqanyn jetkizdi.
«Osy aptanyń sońyna Almatydaǵy Ulttyq kitaphanamen birigip alǵashqy synaq ortalyǵyn ashamyz. Ol basqa qalalarda da, oblys ortalyqtarynda da ashylatyn bolady. Másele árip aýystyrýda emes, másele tilimizdi óziniń tabıǵı zańdylyqtaryna qaıta oraltý», dedi ol.
Raýan QAIDAR,
«Egemen Qazaqstan»
