Eske sala keteıik, ekrandyq týyndynyń rejısseri ári ssenarıı avtory – Qazaqstannyń halyq ártisi, qazaq kınematografııasy «jańa tolqynynyń» belgili ókili – Talǵat Temenov. «Adamdar arasyndaǵy bóltirik», «Qyzǵysh qus», «Mahabbat beketi» syndy kópshilikke tanymal fılmderimen kórermen súıispenshiligine ıe T.Temenovtiń jańa kınotýyndysy jalǵyzdyqtyń kúıin keship júrgen balalar úıiniń 6 jasar tárbıelenýshisi men qarttar úıiniń ardageri arasyndaǵy dostyq baılanys týraly baıandaıdy.
Aıta ketetin jaıt, «Bizdiń qalanyń hanzadasy» fılminiń tusaýkeseri (jumys ataýy «Bıbol») bıyl 1 maýsym – halyqaralyq balalardy qorǵaý kúnine oraı Astana qalasynda ótken bolatyn. Sonymen qatar atalmysh kınotýyndy qyrkúıek aıynda Reseıde ótken II halyqaralyq «Eýrazııalyq kópir» kınofestıvaliniń negizgi baǵdarlamasy sheńberinde kórsetilgen edi.
Fılmniń negizgi túsirilimi Astanada jáne Aqmola oblysynyń Býrabaı aýylynda ótti. Basty rólderdi Ánýar Tóleýǵajy men Qazaqstannyń eńbek sińirgen qaıratkeri Tóleýbek Aralbaı («Jaýjúrek myń bala», «Joıýshy», «Tyǵyryqtan jol tapqan») somdaıdy. Sonymen qatar fılmge Q.Qýanyshbaev atyndaǵy mýzykaly drama teatrynyń akterleri qatysqany málim.
«Bizdiń qalanyń hanzadasy» fılmin endi elimiz kınoteatrlarynan tamashalaýǵa múmkindik týyp otyr.
Qarshyǵa KÚLEN
