Qazaq ulttyq óner ýnıversıteti birinshi kýrs stýdentterin qabyldaý keshin ótkizdi.
Saltanatty sharaǵa Qazaqstannyń eńbek sińirgen ártisi, professor Turar Álipbaev, birqatar óner adamy, stýdentter, arnaıy shaqyrylǵan qonaqtar qatysty.
Merekeli jıynnyń ashylýynda Turar Álipbaev stýdentterge arnap jyly lebizin bildirdi. Sondaı-aq, ol Qazaq ulttyq óner ýnıversıtetiniń rektory Aıman Musaqojaevanyń quttyqtaý sózin oqyp berdi.
Hatta: «Birinshi kýrs stýdentteri, bul sizder úshin erekshe sát. Búgin sizder elimizdiń eń úzdik ýnıversıtetteriniń birine qabyldanyp otyrsyzdar. Saltanatty túrde stýdenttik bıletke ıe bolǵaly tursyzdar. Aldaryńyzda úlken bilim joly kútip tur. Sizderdi osy merekelerińizben quttyqtaı otyryp oqýda ozat bolýlaryńyzdy tileımin! Qadamdaryńyz nyq bolsyn! О́ner jolynda alar asýlaryńyz bıik bolsyn!» delingen.
Osydan keıin stýdenttik ómirge qadam basqan jastarǵa oqý bıletin tapsyrý rásimi ótti. Saltanatty rásimnen keıin jurt nazary konserttik baǵdarlamaǵa aýdy. Alǵash bolyp sahnaǵa barabanshylar toby shyǵyp, óz ónerlerin ortaǵa saldy. Al bıtboks yrǵaǵynyń sheberi, birqatar jarysta jeńimpaz atanǵan Beıbarys Asqarbekov jurtty erekshe áýenimen tánti etti.
Qazaq ulttyq óner ýnıversıteti talantty, shyǵarmashyl jastarǵa toly. Munda sıqyr ilimin meńgerip, túrli fokýstar kórsetip júrgen jastar da joq emes. Solardyń biri – Aıan Nurlybaev óz ónerin kórsetti. Kórermender arasynan birneshe adamdy tańdap alyp, aldaryna kitap qoıdy. Alǵashqysyna kitaptyń betin, endi birine sol bettegi alǵashqy sózdi tańdatty. Al sıqyrshynyń ózi bul sátte nazaryn basqa jaqqa aýdaryp turǵan bolatyn. Osydan keıin ol qolyndaǵy taqtaıshaǵa kitaptyń bet sany men alǵashqy sózdi aınytpastan jazyp, jurtty tań qaldyrdy.
О́z kezeginde art-menedjment salasynyń stýdentteri myń burala bılep, túrli kórinister qoıdy.
О́ner ordasy bolǵannan keıin bul jıynnan dızaınerler de shet qalmady. Olar kórermender aldynda sán kórsetilimin ótkizdi. Túrli dızaınerlik kıimderdi kórgennen keıin jurt beıne bir Mılandaǵy, Parıjdegi sán aptalyǵyna enip ketkendeı kúıde qalyp, tańdanystaryn jasyra almady.
Qazaq ulttyq óner ýnıversıtetinde stýdentterdiń basym bóligi – bolashaq akterler. Olardyń ózara túrli toptary da bar. Bul keshte sahnanyń kórkin qyzdyrǵan akterler dep aıtsaq jańylmaǵan bolar edik. «Balalyq shaqqa saıahat». Mine, bolashaq sahna ıeleri osy maqsatta túrli ónerlerin kórsetti. О́nerpazdar «Tom and Jerry», «Ný, pogodı!» sekildi mýlfılmderden, bir kezderi kópshilik arasynda úlken qyzyǵýshylyqqa ıe bolǵan «Grand Theft Auto (GTA)» oıynynan kórinis qoıdy.
Al júrgizýshiler túrli ázilderi men kúlkili obrazdary arqyly jınalǵan qaýymnyń rızashylyǵyna bólendi.
«Bul naǵyz shyǵarmashyl jastardyń ordasy, solardyń álemi. Shyǵarmashyl jandardyń ishki jan-dúnıesi sondaı názik keletinin umytpaǵan jón. Sapaly dúnıe jaryqqa shyǵýy úshin árqaısysynyń ebin taba bilý qajet. Art-menedjment salasynda bilim alyp júrgennen keıin birneshe stýdent birigip, osy keshti ótkizýdi qolǵa aldyq. Sońǵy kúnderi uıqyny da umyttyq, sebebi joǵary deńgeıde ótýi úshin bárin jan-jaqty qarastyrdyq. Mine, stýdent kúnimizden bastap osylaı tájirıbe jınap júrmiz. Maqsatymyz – oqýymyzdy bitirgennen keıin básekege qabiletti jastardyń qataryna qosylý», – dedi uıymdastyrýshylardyń biri Karına Iýsýpova.
Iá, bolashaq bilimdi jastardyń qolynda. Mundaı talantty, kásibı órenderimiz barda qazaq óneri bir orynda turyp qalmasy anyq...
Aıan ÁBDÝÁLI,
«Egemen Qazaqstan»
