– Bir jyl buryn komandaǵa jańa oıynshylar jetispeıdi dep aıtqan edińiz. Búgin «Astanaǵa» ese jiberdińizder...
– Búgin komandam minezdi ekenin kórsetti. Qarsylastarymyzǵa kóp soqqy jasadyq. Oıynnyń basym bóliginde dopqa ıelik ettik. Alańda jeńiske laıyq bir ǵana komanda boldy. Ol – «Makkabı». Biraq bizge sáttilik jetispedi. Bul – fýtbol. Nátıjesin ózderińiz de kórip otyrsyzdar qalaı aıaqtalǵanyn.
– Tórt týrdan keıin «Makkabı» Eýropa lıgasynyń toptyq kezeńnen shyǵý múmkindiginen aıyryldy. Bul týraly óz pikirińizdi bildirip ótseńiz.
– Eger aldaǵy ýaqytta dál búgingideı deńgeıde oınasaq úlken jetistikterge jetemiz dep oılaımyn. Oıynshylaryma qoıar eshqandaı kinám joq. Olar ózderin 200%-ǵa saldy. Tek sáttilik bizdiń jaqta bolmady.
– «Makkabıdiń» búgingi oıynyn eń joǵary deńgeıi dep esepteýge bola ma?
– Eń birinshi, bizde jaraqat alyp, matchqa qatysa almaǵan oıynshylardyń kóp bolǵanyn esten shyǵarmaıyq. Osynyń saldarynan búkil aýyrtpalyq negizgi oıynshylarǵa tústi. Olar óz ulttyq quramalarynyń oıynshylary. Biraq bári fızıkalyq turǵyda daıyn emes edi. Jaraqat alǵan oıynshylar emdelgennen keıin biz de joǵary deńgeıde óner kórsetip, shabýyldaýshy komandalardyń qataryna qosylamyz. Jalpy aıtqanda búgin shákirtterim jaqsy oıyn kórsetti. Keıinirek matchty qaıta kórip, taldaý júrgizetin bolamyn. Al búgin jaqsy oıyn kórsetkenimizdi taǵy bir márte aıta keteıin.
«Astanany», ásirese bas bapkeri Stanımır Stoılovty jeńisimen quttyqtaǵym keledi. Ol óte jaqsy adam. Qazaqstandyq ujym budan da bıikterge kóteriledi dep úmittenemin. Al ózimiz «Slavııany» jeńip, «Astananyń» toptyq kezeńnen shyǵýyna kómektesý úshin barymyzdy salamyz.
– Oıynshylaryńyzǵa degen kózqarasyńyzdy ózgertip, qatal bapker bolý týraly oılandyńyz ba? Siz ylǵı da óz shákirtterińizdi qorǵap júresiz.
– Tórt aıda 26 oıyn ótkizgenimizdi de túsiný kerek. Buǵan taǵy jaraqat alǵan oıynshylardy qosyńyz. Komandanyń sharshaǵanyn osydan-aq bilýge bolady. Osyǵan qaramastan biz jaqsy oıyn kórsetip júrmiz. Sońǵy eki oıynda segiz gol soqtyq. Búgingi oıynda bar múmkindigimizdi tıimdi paıdalanǵanda 3:0 esebimen jeńiske jeter me edik?! Biraq bul – fýtbol. «Astana» ózin jaqsy qyrynan kórsetti.
– «Makkabı» endi bar kóńilin ishki birinshilikke bóle me? Komandaǵa jańadan oıynshylar qosyla ma?
– Dál solaı. Al transferlik jaǵyna keler bolsaq, alda áli eki aı ýaqytymyz bar. Ázirge ol týraly eshnárse aıta almaımyn.
– «Astana» búgin bes qorǵaýshymen óner kórsetti. Bul sizderge tosyn jaǵdaı boldy ma? Eki oıynda da gol soǵa almadyńyzdar. Osyǵan qarap Qazaqstan fýtboly Izraıldikinen joǵary dep aıtýǵa bola ma?
– Ulttyq quramalardyń deńgeıin klýbtyq oıyndarǵa qarap anyqtaýǵa bolmaıdy. Biraq Izraıl fýtboly nashar dep aıta almaımyn. Iá, «Astana» «Makkabıdi» eki kezdesýde de jeńdi. Degenmen statıstıkaǵa mán beretin bolsaq búgin alańda bir ǵana komandanyń bolǵanyn baıqaýǵa bolady. Bul jerde ulttyq quramalardy salystyrý orynsyz dep bilemin. Mysaly, ótken jyly biz Almatynyń «Qaıratyn» jeńgen bolatynbyz. Osy tusta bıyl «Qaırat» chempıon atanady dep oılaımyn. Al Izraıl ulttyq quramasy Qazaqstannan myqty dep esepteımin.
– Alańnyń sapasyzdyǵy sizderge qıyndyq týdyrmady ma?
– Negizi stadıonymyzda alańnyń sapasy joǵary bolatyn. Biraq oıynnyń nátıjesine bul sebep boldy dep oılamaımyn. Biz negizinen shabýyldaýmen, dopqa kóbirek ıelik etýmen boldyq. Al «Astana» jalǵyz ǵana múmkindigin tıimdi paıdalana bildi.
Almas MANAP,
«Egemen Qazaqstan» – Netanııadan (Izraıl)
