Almatyda «Semeı polıgonyndaǵy aqyrǵy jarylys» taqyrybynda dóńgelek ústel ótti

Pikirtalas barysynda sóıleýshiler aldymen Semeı ıadrolyq synaq po­lı­gonyndaǵy jarylystardyń toq­ta­ǵanyna 25 jyl ótken merzimde qaz­aq­standyq «Nevada-Semeı» qoz­ǵa­lysynyń qol jetkizgen jetis­tik­terine keńinen toqtaldy. Osydan bir jyl buryn ýnıversıtet rektory Ǵal­ymqaıyr Mutanov óz bastamasymen oqý ornynda «Jastar – ıadrolyq synaq­syz álem úshin» atty stýdentter forýmynyń ótýine muryndyq bolǵan edi.

Forýmǵa belgili aqyn, «Nevada-Semeı» halyqaralyq antııadrolyq qoz­ǵalysynyń jetekshisi Oljas Súleı­menov qatysqan. Búgin ýnıversıtet qabyrǵasynda antııadrolyq bas­tamany tikeleı qoldaıtyn ári ha­lyqaralyq uıymnyń jergilikti belsendileri retinde tanylǵan 40 stýdent oqyp jatyr. Dóńgelek ústel ba­synda sóz sóılegen sol uıymnyń je­tekshisi, jaratylystaný ǵylymynyń ma­gıstri, turaqty damý jónindegi IýNESKO kafedrasynyń assıstenti Gúl­janat Tanabekova «izgi nıetpen qu­rylǵan qozǵalystyń Qazaqstannyń eko­logııalyq tazalyǵy men ıadrolyq qaýipsizdigi úshin jalǵasqan kúreske árqashan da qoldaý jasaıtyn bolamyz», dedi. Uıym músheleri, bolashaq ekologtar Mádına Múlikova men Saltanat Jumabaı búgingi eń kókeıkesti eko­lo­gııalyq máselelerge qatysty óz oılaryn ortaǵa saldy. 

Dóńgelek ústelge «Nevada-Semeı» halyqaralyq antııadrolyq qozǵalysy tóraǵasynyń orynbasary Efım Zýslın men qozǵalystyń jaýapty hatshysy Álııa Bekmaǵambetova, antııadrolyq qozǵalystyń birqatar ardagerleri shaqyryldy. Qazaqstannyń jazylmas jan jarasyna aınalǵan Semeı ıadro­lyq synaq alańy týraly ótken jyl­dar ishinde qanshama kitap jazyldy, qanshama derekti fılmder tú­sirildi. Ǵalymdar qupııany ashyp, jet­kilikti tarıhı derekter jarııalady. Olar búgingi qoǵamdyq ortada kórneki qu­ralǵa aınalǵan. Sondyqtan da árbir sóı­leýshiniń deregi naqty, sózi ótimdi shy­ǵyp jatty. 

Basqosýda ǵalamdyq máni bar aý­qymdy sharany Táýelsiz eldiń jas­tary bu­dan bylaı da laıyqty jalǵastyrady degen baılam jasaldy. Bolashaqta ıadrolyq qarýdyń taratylýyna, adam ómirin jalmaıtyn ıadrolyq synaqtardy boldyrmaý jolynda kúrese biletin sergek jastardyń qatarynyń ósip keletinine rızashylyq aıtyldy.

Talǵat SÚIINBAI,
«Egemen Qazaqstan»

ALMATY