Negizi sonaý 1932 jyly Ana men bala densaýlyǵyn qorǵaý ǵylymı-zertteý ınstıtýty bolyp qalanǵan atalmysh ortalyq búginde kásibı tájirıbeli mamandary, qýatty materıaldyq bazasy bar, jańa zaman talaptaryna saı medısınalyq tehnologııalardy qoldanatyn jetekshi ǵylymı-zertteý jáne klınıkalyq mekemege aınalyp otyr. Ol tek emdeý mekemesi ǵana emes, biligi men bilimi ushtasqan kadrlardy ázirleıtin bilim berý bazasy, sonymen birge Qazaqstandaǵy pedıatrııa qyzmetiniń basty úılestirýshisi bolyp tabylady.
Ortalyqtyń maqsaty – ınnovasııalyq tehnologııalardy jáne medısına ǵylymynyń ozyq jetistikterin qoldana otyryp, Qazaqstandaǵy balalar densaýlyǵyn saqtaý jáne nyǵaıtý, balalarǵa sapaly medısınalyq qyzmet kórsetý. Búginde ortalyq álemdik ozyq klınıkalarda túrli taǵylymdamalardan ótken kásibı kadrlarmen jasaqtalǵan. Mekemede eńbek etetin 700-den astam qyzmetkerdiń 147-i dáriger, 1-eýi akademık, 20-sy ǵylym doktory jəne 27-si ǵylym kandıdaty. Onda elimizdiń barlyq óńirinen keletin 18 jasqa deıingi balalarǵa táýlik boıy jáne kúndizgi stasıonar jaǵdaıynda medısınalyq kómek kórsetiledi.
Munda týa bitken damý aqaýyn, qan aýrýlaryn, qaterli isikti, tynys alý jáne as qorytý organdarynyń aýrýlaryn, sondaı-aq balalar jasyndaǵy kúrdeli aýrýlardy álemdik standart boıynsha emdeıtin hırýrgııa, neonatologııa, onkologııa jáne gematologııa, somatıka, pýlmonologııa, kardıorevmatologııa, balalar kardıohırýrgııasy jəne ıntervensııalyq kardıologııa, nərestelerdiń jan saqtaý bólimi syndy 25-ten astam bólim bar.
Saltanatty jıyndy ashqan Pedıatrııa jáne balalar hırýrgııasy ortalyǵynyń dırektory, medısına ǵylymdarynyń doktory, professor Rıza Boranbaeva ortalyqtyń negizi qalanǵan kezden zamanaýı dıagnostıkalyq jáne emdeý jabdyqtarymen jaraqtalǵan qazirgi ǵylymı ortalyqqa deıin damyǵan úlken tarıhy bar ekenine toqtala kelip, «Biz barlyǵymyz osyndaı ortalyqta jumys isteýge múmkindigimizdiń bolǵanyn jáne pedıatrııalyq qyzmettiń negizin qalaǵan ustazdarymyzdyń isin jalǵastyrý jolyndaǵy úlesimizdi maqtan etemiz, dep ózderi qol jetkizgen jetistikterimen bólisti.
Al mereıtoımen quttyqtaýshylardyń biri akademık Tóregeldi Sharmanuly «Ǵylymı ortalyq – ult densaýlyǵyna qamqorlyqtan týǵan úlken ujymnyń biri. Kezinde Kamal Sárýarulynyń bastamasymen ana men bala densaýlyǵyn jeke-dara bólinip, pedıatrııa ǵylymı-zertteý ınstıtýty óz aldyna otaý qurdy. Bul – halyqtyń armany edi. Al búginde elimizde balalar densaýlyǵynyń qyzmeti eselep ósip keledi. Ol jetistikter 85 jyl boıy osy ortalyqta ter tógip, eńbek etken esimdermen tikeleı baılanysty. Olardyń árqaısynyń eńbegi erekshe, qosqan úlesteri zor. Sondyqtan da búgin ǵylymı ortalyqty qadirlep, mártebesin bıiktetetin mereke bolyp jatyr» dese, osy ortalyqty 1981 jyldan qolǵa alyp, on úsh jyl basqarǵan balalar hırýrgııasynyń atasy K.Ormantaevtyń da aıtary az bolǵan joq.
– О́tkensiz búgin joq. Ol kezde ǵylymı ınstıtýt Ormanov kóshesindegi shaǵyn mekemede ornalasqan. Osynda basshylyq qyzmetke kelgen soń Dımash Ahmetulynyń qabyldaýynda bolyp «Ǵylymı ınstıtýt bolǵan soń shetelden qonaqtar keledi, kishkentaı ǵana ǵımarattyń aınalasynda tolǵan ıt pen mysyqtyń júrgeni uıat qoı...» dep aıtyp edim, kósheli kisi ǵoı, birden sózge kelmeı Almaty oblystyq partııa komıtetiniń hatshysy K.Aýhadıevke habarlasyp, sol kezde salynyp jatqan oblystyq aýrýhananyń ǵımaratyn ınstıtýtqa berýdi tapsyrdy. Sóıtip irgetasyn birge qalastyq. Búgingi ortalyq jumysyna kóńilimiz tolady. Ortalyqtyń bolashaǵy zor», dedi Kamal Sárýaruly.
Shara aıasynda ortalyqta uzaq jyldar qyzmet atqarǵan, el bolashaǵy – balalar men nárestelerdi emdep, ult densaýlyǵyn jaqsartýǵa ólsheýsiz úles qosqan qyzmetkerler men ardager-dárigerler marapattaldy.
Gúlzeınep SÁDIRQYZY,
«Egemen Qazaqstan»
