«Latyn álipbıine kóshý – «Rýhanı jańǵyrýdyń» úlken baǵyty. Árıne, qazir dıgraf pen apostrafqa baılanysty qoǵamda ártúrli pikirler aıtylyp jatyr. Bul – óte mańyzdy. Osyndaı pikirtalastardyń bolǵanyna biz qýanýymyz kerek. Bul – qazaq qoǵamynyń, ásirese jastardyń óz bolashaǵyna, óz taǵdyryna beıjaı qaramaıtyndyǵyn kórsetedi. Elbasynyń qabyldaǵan sheshimi – saıası sheshim. Alda úlken jumystar kútip tur. Latyn qarpine kóshý uzaq ýaqytqa sozylatyn tarıhı prosess.
Latyn qarpine kóshýge baılanysty arnaıy memlekettik komıssııa qurylady. Osy komıssııa quramyna memlekettik ǵylymı-zertteý ınstıtýttarynyń ókilderi, qoǵam belsendileri, saıasattanýshylar, taǵy basqa da sarapshylar mindetti túrde enedi. Sodan keıin qazirgi ýaqytta qoǵam tarapynan aıtylyp jatqan pikirler-usynystar eskerilip, ortaq baılamǵa, ortaq mámilege kelemiz degen oıdamyn. Latyn qarpine kóshý qazaqtyń rýhanııatyn, tól mádenıetin sapaly deńgeıge jetkizedi. Búgingi tańda dúnıe júzindegi barlyq tehnologııalar latyn qarpinde. Eger biz latyn qarpine ótetin bolsaq, qoǵamdyq sanamyz, áleýmettik sanamyz ózgeredi», – dedi saıasattanýshy.
Budan keıin sóz alǵan qoǵam qaıratkeri, belgili jýrnalıst Ermurat Bapı latyn qarpine kóshý álemdik órkenıetten qalmaý jolyndaǵy qadam, bul keleshek úshin qajet dúnıe ekendigin aıtty. Jáne bul máselede asyǵystyq tanytpaı, baıyppen qaraýdyń mańyzdylyǵyna toqtaldy. Latyn qarpine kóshemiz. Bul keleshek urpaq úshin kerek. Degenmen qazir latyn álipbıiniń sońǵy nusqasyna qatysty ártúrli pikirler, usynystar aıtylyp jatyr. Munyń bárin eskerý kerek. Apostrof máselesin, qariptiń psıhologııalyq máselesin, áripterdiń úndestik zańyna sáıkes keletindigin, bárin muqııat qarastyrǵanymyz jón. Bizdiń tildiń qudireti men qasıetin saqtaıtyn qaripterdiń durys dybystalýyna mán berýimiz kerek. Arnaıy komıssııa osynyń bárin sheshedi, bir júıege keltiredi dep oılaımyz. Latyn qarpine kóshý máselesinde jastar belsendilik tanytyp, ózderiniń oı-pikirlerin bildirip jatyr.Bul bizdi qýantady. Qoǵamdy jańǵyrtýǵa jastar da óz úlesin qosýy kerek», – dedi ol.
Azamat QASYM,
«Egemen Qazaqstan»
О́SKEMEN
