Týrlarǵa Almaty, Aqmola, Jambyl, Qaraǵandy, Pavlodar jáne Ońtústik Qazaqstan oblystarynyń 13 jáne 17 jas aralyǵyndaǵy 480 úzdik oqýshysy qatysady.
Osylaısha Aqmola, Qaraǵandy jáne Pavlodar oblystarynyń oqýshylary Astanaǵa kelse, Almaty, Jambyl jáne Ońtústik Qazaqstan oblystarynyń úzdik oqýshylary Almaty qalasy men Úshqońyrǵa barady.
Astanada oqýshylarǵa Qazaqstan Respýblıkasy Tuńǵysh Prezıdenti – Elbasynyń murajaıy, qory men kitaphanasy, Beıbitshilik pen kelisim saraıy, «Astana-Báıterek» monýmenti jáne Nazarbaev Ýnıversıteti tanystyrylady.
Almatylyq týrdyń baǵdarlamasy boıynsha Almaty oblysyndaǵy Elbasy oqyǵan Qarasaı batyr atyndaǵy mektep, Qazaqstan Respýblıkasy Tuńǵysh Prezıdentiniń úı-murajaıy, «Batyr Babalar» memorıaldy kesheni, sondaı-aq Almaty qalasyndaǵy Ortalyq memlekettik murajaı, 28 panfılovshylardyń saıabaǵy sııaqty obektilerge barý josparlanǵan.
Qazaqstan Respýblıkasynyń Tuńǵysh Prezıdenti – Elbasy Qory atqarýshy dırektorynyń keńesshisi Álııa Qaısharovanyń aıtýynsha, osyndaı týrlardy ótkizý mektep oqýshylarynyń oı-órisin keńeıtip, qyzyǵýshylyǵyn arttyrady ári balalardy jaqsy oqyp, belsendi bolýǵa qosymsha yntalandyratyn bolady.
«Nazarbaev ortalyǵynda» oqýshylardyń birinshi tobymen kezdesý barysynda «Kazakh Tourism» ulttyq kompanııasy» AQ basqarma tóraǵasynyń orynbasary Qaırat Sádýaqasov osyndaı týrlardyń balalar men jasóspirimder týrızmin jandandyrýǵa, sondaı-aq elimizdiń jas urpaǵyn patrıottyq tárbıeleýine zor áser etetinin atap ótti. «Balalar men jasóspirimder týrlary jas urpaqtyń patrıottyq rýhyn qalyptastyrýda mańyzdy ról atqara otyryp, elimizdegi ishki týrızmdi damytýǵa áser etedi», dedi ol.
Sondaı-aq Q.Sádýaqasov EKSPO-2017 kórmesi kezinde elimizdiń óńirlerinen kelgen 185 myń oqýshy úshin 700-den astam týr uıymdastyrylǵanyn eske saldy.
«Egemen-aqparat»
