Memlekettik qyzmetter departamentiniń dırektory Á.Muqashev Elbasynyń memlekettik apparattyń halyqpen ózara qarym-qatynastarynda birjaqty-óktem kózqarastardan arylyp, azamattarǵa memlekettik qyzmetterdi tıimdi túrde kórsetýge kóshýge qatysty qoıǵan mindetterdi júzege asyrýǵa nazar aýdardy. Spıker, sondaı-aq memlekettik qyzmetter kórsetýdi avtomattandyrý qajet ekenin, bul sybaılas jemqorlyq kórinisterin azaıtýǵa yqpal etetinin sóz etti.
Nazarbaev Ýnıversıtettiń professory Kolın Noks óz sózinde azamattar men bızneske memlekettik qyzmetterdi kórsetý sapasyn qamtamasyz etý boıynsha elimizde júrgizilip jatqan saıasatty oń baǵalady. Is-shara barysynda qatysýshylar sıfrlandyrý, aqparattyq júıelerdi yqpaldastyrý, halyqtyń kompıýterlik saýatyn joǵarylatý máselelerin belsendi talqylady.
Jıynda aıtylǵandaı, tizilimdegi 746 qyzmettiń 90-y ǵana tolyq avtomattandyrylǵan jáne «Elektrondy úkimet» arqyly kórsetiledi, al jekelegen qyzmetter tehnıkalyq sebepterge baılanysty portalda qoljetimdi emes. Budan bólek, aqparattyq júıeler men baǵdarlamalyq ónimder «Elektrondy úkimet» portalymen 12 paıyzǵa ǵana yqpaldastyrylǵan, bul qyzmetterdi elektrondyq nysanda kórsetýge múmkindik bermeıdi jáne azamattardy ártúrli anyqtamalardy alý úshin basqa organdarǵa júginýge májbúr etedi.
Aqparattyq júıelerdiń yqpaldastyrylýymen jáne qyzmetterdi elektrondy formatqa kóshirýmen 90 paıyz qyzmet «Elektrondy úkimet» portaly, al qalǵandary Memlekettik korporasııa arqyly kórsetiletin bolady. Kózdelgen maqsatqa jetý úshin halyqtyń kompıýterlik saýatyn joǵarylatý, onyń ishinde «Elektrondy úkimet» portalymen jumys isteý daǵdysyn oqytý kerek.
Osyǵan baılanysty jastar men aǵa býyn ókilderi, aýyl turǵyndary arasynda «Azamattarǵa arnalǵan úkimet» memlekettik korporasııasy» KE AQ front-ofıster, jergilikti atqarýshy organdar, memlekettik kirister organdary, mektepter, kolledjder, JOO, kitaphanalar bazalarynda oqytýdy júrgizý qajet.
Semınarda azamattarǵa qoljetimdiligi qıyn jekelegen qyzmetter týraly da aıtyldy. Mundaı qyzmet túrlerin tek ortalyq memlekettik organdar ǵana kórsetedi. Osyǵan baılanysty olar qyzmet alý úshin Astanaǵa kelýi qajet. Sondyqtan ortalyq memlekettik organdarǵa mundaı qyzmetterdi aýmaqtyq bólimshelerine berý usynyldy.
Azamattar úshin mańyzdy máselelerdiń biri – standarttar men reglamentter kóleminiń úlken jáne túsiný úshin asa qıyn bolýy. Soǵan baılanysty qoljetimdi jáne qajetti málimetterdi ǵana qamtıtyn check-paraqtaryn ázirleý máselesi aıtyldy.
Semınar sońynda qatysýshylar ár oblystyq ákimdikte memlekettik qyzmetter boıynsha derbes basqarma qurýdy usyndy. Bul basqarma vedomstvolyq baǵynystylyǵyna qaramastan, óńirdegi barlyq qyzmet berýshilerdiń jumysyn úılestiretin jáne týyndaǵan problemalardy jedel sheshetin bolady.
Daıyndaǵan
Joldybaı BAZAR,
«Egemen Qazaqstan»
