Aldyn ala málimetterge qaraǵanda, qara tústi kıim kıgen, qolynda vıntovkasy bar kúdikti jergilikti ýaqyt boıynsha saǵat 11.30-da Sazerlend-Sprıngs qalasyndaǵy shirkeý ǵımaratyna kirip, oq jaýdyrǵan. Bul ýaqytta jeksenbilik qulshylyq júrip jatqan. Polısııanyń habarlaýynsha, ázirge qaıtys bolǵandardyń 5-72 jas aralyǵynda ekeni anyqtaldy.
Resmı organdar kúdiktiniń esimin atamaǵanymen, amerıkalyq buqaralyq aqparat quraldary oq jaýdyrǵan adam AQSh Áskerı-áýe kúshterinen shyǵarylǵan Devın Patrık Kellı bolýy múmkin dep jazyp jatyr.
Ýılson okrýgynyń polısııa komıssary Albert-Geımzdiń aıtýynsha, kúdikti oqıǵa ornynan kólikpen ketip qalǵannan keıin óli tabylǵan. Polısııa kúdiktini turǵyndardyń biri óltirgenin aıtty. Oqıǵa ornynda polısııa jumys istep jatyr. Kúdiktiniń ne sebepti mundaı áreketke barǵany áli belgisiz.
Sazerlend-Sprıngs - San-Antonıo qalasynyń ońtústik-shyǵysyndaǵy 400 turǵyny bar qala.
AQSh Prezıdenti Donald Tramp Týıtterdegi paraqshasynda: "Tehastaǵy Sazerlend-Sprıngs qalasyndaǵy adamdarǵa Qudaı jar bolsyn. Quqyq qorǵaý organdary men Federaldyq tergeý bıýrosy oqıǵa ornynda jumys istep jatyr. Men oqıǵany Japonııadan baqylap otyramyn", dep jazdy.
Tehastaǵy bul oqıǵa Las-Vegastaǵy 59 adam qaza tapqan atystan keıin bir aı ótken soń bolyp otyr. Sondaı-aq 31 qazan kúni Nıý-Iorkte shaǵyn júk kóligi adamdardy qaǵyp ótip, 8 adamdy óltirgen bolatyn.
Daıyndaǵan Gúlnur Qýanyshbekqyzy,
"Egemen Qazaqstan"
