Kelissóz sheńberinde Qazaqstan Qorǵanys mınıstriniń orynbasary, general-leıtenant Talǵat Muhtarovtyń brıgadalyq general Hamud Álı Djýma Álshehıımen kezdesýi boldy. Onda eki eldiń qorǵanys salasyndaǵy vedomstvolary arasynda berik strategııalyq seriktestiktiń qalyptasýynda atalǵan sharanyń mańyzdylyǵy atap ótildi. Jumys qorytyndysy boıynsha Qazaqstan Qorǵanys mınıstrligi men BAÁ Qarýly kúshteri arasyndaǵy ekijaqty áskerı yntymaqtastyq josparyna qol qoıyldy. Bul jospar ekijaqty qarym-qatynastyń damýynyń ári qaraıǵy baǵytyn aıqyndaıdy.
Sol sııaqty bul kúnderi Belarýs Respýblıkasynyń Mınsk, Brest qalalarynda UQShU Qorǵanys mınıstrleri keńesi janyndaǵy Áskerı komıtettiń otyrysy ótýde. Oǵan Qorǵanys mınıstriniń birinshi orynbasary – Qazaqstan QK Bas shtabynyń bastyǵy, general-leıtenant Murat Maıkeev, UQShU Birikken shtabynyń bastyǵy, general-polkovnık Anatolıı Sıdorov, Armenııa, Belarýs, Qyrǵyz Respýblıkasy, Reseı Federasııasy jáne Tájikstan Qarýly kúshteri bas shtabtarynyń basshylary qatysýda.
Olar UQShU-nyń áskerı qurylymyn damytý, ujymdyq qaýipsizdik óńirlerinde áskerı-saıası jaǵdaıdy damytý máselelerin talqylap, 2017 jyldyń jedel jáne jaýyngerlik daıarlyǵynyń birlesken is-sharalarynyń qorytyndysyn shyǵarady. Taraptar Ujymdyq jedel den qoıý kúshterin óristetý josparyn qarastyryp, múshe memleketter múddesinde aqparattyq qaýipsizdik júıesin qalyptastyrý men damytýǵa baǵyttalǵan Ujymdyq qaýipsizdik keńesiniń sheshimderin jáne aqparat qaýipsizdigin qamtamasyz etýdi iske asyrý týraly máselelerdi qaraıdy dep kútilýde.
Aleksandr TASBOLAT,
«Egemen Qazaqstan»
