Táýelsiz Memleketter Dostastyǵyna qatysýshy elderdiń Parlamentaralyq Assambleıasynyń (TMD PAA) qurylǵanyna bıyl 25 jyl toldy. Onyń jumysyna Parlament depýtattary ǵana emes, túrli atqarýshy organdardyń mamandary, ǵalymdar men kásibı zańgerler qatysady. TMD PAA-nyń mańyzdy mindetteriniń biri – qatysýshy memleketter zańnamalarynyń bir-birine úılesimdi úlgilerin ázirleý.
Osy mindetterge sáıkes zańnamalyq aktiler Dostastyq elderiniń jáne kóbinese eýropalyq pen álemdik halyqaralyq quqyqtyq standarttarǵa sáıkes jasalýda. TMD PAA qurylǵannan beri 300-den artyq úlgilik zańnamalar men 100-den artyq usynystar qabyldandy. Olardyń bári de ulttyq zańnamanyń damýy men tıimdiligin arttyrýǵa aıtarlyqtaı úles qosty. Al Dostastyq elderi depýtattarynyń birlesken jumystary parlamentaralyq yntymaqtastyqty damytýda mańyzdy ról atqarady.
Memleket basshysy ulttyq zańnamalardy halyqaralyq standarttar deńgeıine jetkizý máselesin birneshe ret kóterdi. Qazaqstan Respýblıkasynyń Prezıdenti bekitken 2010-2020 jyldarǵa arnalǵan quqylyq tujyrymdamada: «ulttyq quqyqtardy zamannyń jańa talaptaryna sáıkes jáne básekelestikke qabiletti qylý maqsatyn qamtamasyz etý úshin memlekettiń normalyq jáne quqyq qoldaný isterin odan ári jetildirý kerek», dep jazylǵan. Osy talaptyń sheńberinde, bizdiń oıymyzsha, TMD PAA ázirleıtin qoǵamdyq qatynastardyń barlyq salalaryna qatysy bar úlgilik zańnamalyq aktiler de óziniń mańyzdy róli bar.
Osyǵan baılanysty, Qazaqstan Respýblıkasynyń Úkimeti kóptegen zań jobalarynyń bastamashysy bolyp otyrǵandyqtan, elimizdiń zańnamalyq aktilerin ázirlegende TMD PAA usynǵan úlgilik zańnamalyq aktiler men usynystardy eskerýi qajet dep sanaımyn. Ol úshin Qazaqstan Respýblıkasynyń «Quqyqtyq aktiler týraly» zańyna ázirleýshi organ úlgilik zańnamalar men usynystardy eskerýi qajet degen tolyqtyrýdy jańa zań jobasymen engizý múmkindigin qarastyrý qajet dep bilemin. Men osy usynystardy Premer-Mınıstr B.Saǵyntaevtyń atyna joldap, bastamany aıaqsyz qaldyrmaýdy ótindim.
Vladımır VOLKOV,
Senat depýtaty
