«Elbasy Nursultan Nazarbaevtyń tapsyrmasyna sáıkes, jańa jyldan bastap zeınetaqy kóleminiń mólsheri 2016 jylmen salystyrǵanda 20 paıyzǵa kóbeıtiledi. Osylaısha memleket áleýmettik mindettemeler boıynsha tıisti sharalardy júzege asyrýda. 1 qańtardan bastap Qazaqstanda yntymaqty zeınetaqy kólemi 8 paıyzǵa, bazalyq zeınetaqy jáne basqa da járdemaqy túrleriniń kólemi 6 paıyzǵa ósedi. Sonymen birge bazalyq zeınetaqyny taǵaıyndaýdyń ádis-tásilderi de ózgeredi. Máselen, búginde bazalyq zeınetaqy tólemderi eńbek ótili esepke alynbaı barlyǵyna birkelki berilip kelse, 2018 jyldyń 1 shildesinen bastap eńbek ótiline qaraı eseptelip bólinetin bolady», dedi ol.
Svetlana Jaqypovanyń aıtýynsha, jınaqtaýshy zeınetaqy qoryna jınalǵan zeınetaqy jarnasyn eskere otyryp, 1998 jyldyń 1 qańtaryna deıingi de, 1998 jyldyń 1 qańtarynan keıingi de eńbek ótili esepke alynady.
«Mysaly, eger azamat keler jyly zeınetkerlikke shyǵatyn bolsa, 1998 jyldyń 1 qańtaryna deıingi birlesken zeınetaqy júıesindegi eńbek ótili 20 jyl jáne 15 jyl boıy zeınetaqy jınaqtaý qoryna úzilissiz zeınetaqy jarnasyn tóledi dep eseptelik. Osylaısha, onyń jıyntyq eńbek ótili 35 jylǵa teń bolady. Jańa júıeniń ádis-tásiline sáıkes, eger eńbek ótili 10 jyldan kem bolǵan jaǵdaıda, eń tómengi ómir súrý deńgeıinen 54 paıyzǵa taǵaıyndalady.
Bul soma keler jyly 15274 teńgeni quraıdy. Eńbek ótili 10 jyldan asatyn bolsa, ár jyl úshin 2 paıyz ústeme qosylady. Eger joǵarydaǵy mysalda keltirilgendeı, jalpy eńbek ótili 35 jyl bolatyn bolsa, bazalyq zeınetaqy mólsheri eń tómengi ómir súrý deńgeıiniń 100 paıyzy kóleminde, eger eńbek ótili 20 jyl bolatyn bolsa, eń tómengi ómir súrý deńgeıiniń 74 paıyzy kóleminde taǵaıyndalady», dedi vıse-mınıstr.
Dál qazir elimizde bazalyq zeınetaqy alatyn 2 mln 139 myń adam bar. Olardyń 44,1 paıyzynyń bazalyq zeınetaqysy eki esege kóteriletin bolady. Iаǵnı, bul zeınetkerler búgingi kúni 14 466 myń teńge alatyn bolsa, 1 shildeden 28 274 teńge zeınetaqy alady.
«Bul shara eńbek ótili kóp bola tura az zeınetaqy alyp kelgen zeınetkerlerdiń zeınetaqysyn aıtarlyqtaı joǵarylatyp, áleýmettik ádilettilikti ornatady. Sonymen qatar 1 qańtardan bastap eń tómengi kúnkóris deńgeıiniń qurylymy da ózgeredi. Búgingi mólsher – 24 459 teńge. Qurylymnyń ózgerýi tómengi ómir súrý deńgeıiniń mólsherin 16 paıyzǵa arttyrýǵa múmkindik beredi. Eske sala keteıik, qazirgi tańda azyq-túlik sebeti azyq-túlik jáne azyq-túlikke jatpaıtyn bólikten turady, munyń qatynasy sáıkesinshe 60 ta 40 paıyz.
2018 jyldyń 1 qańtarynan bastap bul qatynas azyq-túlikke jatpaıtyn bólikti ulǵaıtýǵa qaraı ózgerip, sáıkesinshe 55 jáne 45 paıyz bolady. Nátıjesinde, keler jyldyń 1 qańtarynan bastap eń tómengi kúnkóris deńgeıiniń mólsheri 28 284 teńge bolmaq. Bul shamamen 3 mıllıonǵa jýyq adamnyń áleýmettik jaǵdaıyn jaqsartýǵa múmkindik beredi», dedi S.Jaqypova.
Raýan QAIDAR,
«Egemen Qazaqstan»
