Instıtýttyń balalar bólimshesiniń oftalmologtary jáne rezıdent-oftalmologtar 7 men 17 jas aralyǵyndaǵy 200-den asa oqýshynyń kózin tekserip, zertteý jumystaryn júrgizdi. Birneshe aptaǵa sozylǵan aýqymdy jumystyń nátıjesinde mektep tarıhynda alǵash ret balalardyń jasy, dıagnozy, júrgizilgen operasııalar sany, qosalqy aýrýlary jáne ári qaraı ne isteý kerektigi jazylǵan elektrondy baza jasaqtaldy. Tekseris barysynda balalar arasynda aldaǵy ýaqytta kózge refraksııalyq túzetý júrgizý maqsatynda Kóz aýrýlary ǵylymı-zertteý ınstıtýtynda lazerlik jáne hırýrgııalyq emdeýdi qajet etetin 120 jaǵdaı anyqtaldy.
Bul mektep 1932 jyly Almaty qalalyq halyq komıssarıatynyń sheshimimen ashylyp, 1957 jyly zaǵıp jáne kózi nashar kóretin balalarǵa arnalǵan oqý ornyna Nıkolaı Ostrovskııdiń aty berildi. 1971 jyly mektep qazirgi ǵımaratyna kóship keldi. Almaty qalasyndaǵy kózi nashar kóretin jáne múlde kórmeıtin balalardy oqytatyn birden-bir arnaıy oqý ornynda uzaq jyl boıy orta bilimdi medısınalyq qyzmetkerlerden bólek, oftalmolog dárigerler jumys istep kelgen edi. Alaıda sońǵy jyldary elimizde turǵan jerine baılanysty emdelý múmkindigi týyndady degen syltaýmen oftalmologtyń orny qysqaryp, «erekshe» balalar dárigerler tarapynan júrgiziletin qajetti kásibı baqylaýdan aıyrylyp qaldy.
Qazirgi tańda oqý ornynda 32 synyp bar. Onda 221 bala bilim alady jáne synyptardyń 11-inde qazaq tilinde sabaq ótkiziledi. Mektepte zamanaýı tehnıkamen jabdyqtalǵan, ınteraktıvti taqtalar ornatylǵan 15 kabınet, 2 kompıýterlik synyp, úsh sheberhana, sporttyq zal, kitaphana, oqý jáne oıyn zaly jumys istep tur.
Halyqaralyq «Aq taıaq» kúni 1970 jyly 15 qazanda halyqaralyq zaǵıptar federasııasynyń qoldaýymen bekitilgen. Aq taıaq – zaǵıp jannyń nyshany – qoǵamdaǵy deni saý adamdarǵa ortamyzda múmkindigi shekteýli jandardyń ómir súrip jatqanyn, olarǵa bizdiń tarapymyzdan kómek kerek ekenin eske salatyn qasirettiń belgisi. Aq taıaqtyń tarıhy sonaý 1921 jyldan bastalady. Sol jyly kórý qabiletinen aıyrylǵan aǵylshyn Djeıms Bıgs kóshedegi kádimgi taıaq ustaýshylardan erekshelenip kóriný úshin qolyna ustaıtyn taıaǵyn aq túske boıatyp alady. Sonymen birge ózi sııaqty zaǵıp jandarǵa taıaqtaryn aq túske boıaýǵa keńes beredi. Sodan on jyl ótkennen keıin ǵana Anglııa úkimeti kózi kórmeıtin jandardy aq taıaqpen qamtamasyz ete bastaıdy. Keıinnen aq taıaq Fransııaǵa jetedi. Al búginde aq tústi taıaq álem boıynsha zaǵıp jandardyń belgisi bolyp esepteledi.
«Aq taıaq» kúni – jaryq dúnıeni emin-erkin kóre almaıtyn, múmkindigi shekteýli balalarǵa qoǵamnyń nazaryn aýdaryp, olarǵa qolymyzdan kelgenshe járdem berip, janashyrlyqty sezdirip, bolashaqqa úmiti men senimin nyǵaıtyp, jaqsylyqqa jeteleýdiń bir múmkindigi. Kún saıyn tańnyń atqany men kúnniń batqanyn tamashalaı alatyn jandardy kún sáýlesin kórýdi ańsaıtyn zaǵıp búldirshinderge qol ushyn berýge shaqyrý. О́ıtkeni mundaı balalar bizdiń qamqorlyǵymyz ben kómegimizge muqtaj.
Maqsat RAMAZANULY,
jýrnalıst
ALMATY
