Qazirgi tańda Qazaqstan men Qytaı ózara aýyl sharýashylyǵy salasyndaǵy baılanysyn nyǵaıta túsýde. Bul qos taraptyń atalǵan sala boıynsha áriptestikti odan ári damytýǵa degen oń talabyn ańǵartady.
Aýyl sharýashylyǵy mınıstri Asqar Myrzaxmetovtiń qytaılyq áriptesi Han Chanfýmen kezdesýinde belgili bolǵandaı, endi eki el agroǵylym salasyn ushtastyrýǵa erekshe basymdyq bermek. Qazaqstandyq áriptesiniń bul jónindegi usynysyn Qytaı mınıstri quptap otyr. Kórshimizdiń osy baǵyttaǵy ozyq tehnologııasyn paıdalaný bizge de tıimdi. Keler jyly máseleni pysyqtaý úshin eki el ǵalymdarynyń kezdesýi josparlandy.
Qytaı aýyl sharýashylyǵy ǵylymdar akademııasy departamentiniń dırektory Sıýı Mınniń aıtýynsha, ekijaqty yntymaqtastyqty ilgeriletý, ásirese agroǵylym salasyndaǵy áriptestikti jandandyrý eki elge de tıimdi.
Jalpy, Qytaıda aýyl sharýashylyǵy kooperasııasy jaqsy damyǵan. Kórshimiz bul saladaǵy tájirıbesimen bólisýge daıyn.
Beıjińdegi jumys sapary barysynda Asqar Myrzaxmetov Sapany qadaǵalaý, ınspeksııa jáne karantın jónindegi memlekettik komıtettiń mınıstri Chjı Shýpınmen de kezdesti. Taraptar Qazaqstannan Qytaıǵa satylatyn jylqy etine qoıylatyn karantındik talaptardyń hattamasyna qol qoıdy. Sonymen birge qazaqstandyq agroóndiristik keshenge ınvestısııa tartý men osy saladaǵy saýda-sattyqty arttyrý boıynsha birqatar kelissóz júrgizildi.
Bul týraly Qytaı kompanııacynyń basshysy Lı Hýnsın: «Biz úshin kezdesý jemisti aıaqtaldy. 3 memorandým men bir kelisimshartqa qol qoıdyq. Aldaǵy ýaqytta qazaqstandyq áriptesterimizben birlesip agrobırja qurmaqpyz», deıdi.
Qytaı tarapy ınvestısııalyq jáne qarjylyq qyzmetterge jaýapty bolmaq. Texnıkalyq qoldaý men qyzmetkerler daıyndaýǵa Dalıan bırjasy kómek jasaıdy. О́ıtkeni qazir Dalıan aýyl sharýashylyǵy ónimderin bırjada satýda álemde aldyńǵy orynda.
Budan bólek, ekijaqty kezdesý barysynda qazaqstandyq dıqandardyń astyǵyn alyp eldiń naryǵyna shyǵarý máselesi de sóz boldy. Taıaýda Qytaıǵa 20 myń tonna bıdaı men 2 myń tonna ósimdik maıy jóneltilmek. Shyǵystaǵy kórshimiz Qazaqstandaǵy 2017-2024 jyldarǵa arnalǵan iri qara malyn ósirý jobasyna da 600 mln dollar ınvestısııa salýǵa kelisip otyr. Kórshi eldiń ınvestorlary aldaǵy ýaqytta Ońtústik Qazaqstan oblysynda quny 100 mln AQSh dollaryn quraıtyn agroındýstrıaldy keshen salmaq. Dál osyndaı somaǵa joǵary sanatty bıdaıdy tereń óńdeıtin kásiporyndy iske qosý da josparda bar kórinedi.
Sonymen qatar osy sapar barysynda qazaqstandyq jáne qytaılyq kompanııalar arasynda saýda salasynda jáne agroónerkásiptik keshenge ınvestısııalar tartý boıynsha yntymaqtastyq týraly birqatar kelisimderge qol qoıyldy. Atap aıtar bolsaq, olar: «QazAgro» UBH» AQ men «State Development and Investment Corporation» arasynda Ońtústik Qazaqstan oblysynda Agroónerkásip keshen salý týraly memorandým; «KazAgro» UBH»AQ jáne «Grand China Business Management Co.» kompanııasy arasynda birinshi klasty bıdaı ónimderin ósirýdi uıymdastyrý jobasyn qarjylandyrý boıynsha memorandým; «Azyq-túlik korporasııasy» AQ men Dalian Commodity Exchange arasynda kóterme saýda ortalyqtarynyń jelisin qurý jáne taýar bırjasyn uıymdastyrý týraly memorandým; «Azyq-túlik kelisimshart korporasııasy» AQ men «Grand China Business Management»LTD arasynda 20 myń tonna birinshi klasty bıdaıdyń eksportyna qatysty kelisim; «Azyq-túlik kelisimshart korporasııasy» AQ men «Grand China Business Management» LTD arasynda 2 myń tonna ósimdik maıyn eksporttaý týraly kelisim; 2018-2024 jyldarǵa arnalǵan ınvestısııalyq baǵdarlamany iske asyrý týraly «Qazaqstannyń et assosıasııasy» QQ jáne CITIC Construction arasynda qara mal men sıyr eti óndirisi jáne eksporty úshin ınfraqurylym qurý týraly kelisim.
Daıyndaǵan
Joldybaı BAZAR,
«Egemen Qazaqstan»
