Ashat RAIQUL,
«Egemen Qazaqstan»
«Nur Álem», art-ortalyq, úzdik tájirıbeler aımaǵy jáne taqyryptyq pavılon syndy EKSPO-nyń tórt nysany týrıstik oryn retinde qaıta ashylǵan bolatyn. Osy oqıǵaǵa baılanysty Astana turǵyndary men qonaqtary 11-12 qarasha kúnderi EKSPO-2017 kórmesinen qalǵan týrıstik nysandardy tegin aralaý múmkindigine ıe boldy.
Premer-Mınıstr men «Astana EKSPO-2017 UK» AQ basqarma tóraǵasy Ahmetjan Esimov ǵımarattyń segizinshi qabatyna kóterilip, Astananyń bolashaǵy jónindegi eksponattardy aralap shyqty. Sondaı-aq A.Esimov Premer-Mınıstrge EKSPO-2017 aýmaǵynyń aldaǵy jospary týraly baıandady. «Prezıdentimizdiń ıdeıasy – kórme kelesheginiń jarqyn bolýynda. Bul – bolashaqqa degen ınvestısııa, adam kapıtalyn damytý baǵyty. Ázirlengen jáne maquldanǵan kórmeden keıin nysandardy qoldaný tujyrymdamasy osynyń jarqyn mysaly», dedi basqarma tóraǵasy.
Ahmetjan Esimov EKSPO-2017 kórmesi kezinde tanymal bolǵan «Nur Álem» pavılonyna toqtalyp, munda shara barysynda 1 mln 300 myń adam kelgenin eske saldy. Endi ol «Bolashaq energııasy» mýzeıi retinde jumys istep, kelýshilerin ártúrli jańǵyrmaly energııa kózderimen, osy saladaǵy sońǵy jetistiktermen tanystyrmaq. «Men «Nur Álem» pavılony Parıjdegi Eıfel munarasy, Brıýsseldegi «Atomıým» ispetti belgili nysanǵa aınalaryna senimdimin», dedi ol.
Aıta keterligi, «Nur Álem» ǵımaraty men taqyryptyq pavılondar energııa mýzeıi retinde jumystaryn jalǵastyrýda. Al osy aýmaqtaǵy ózge ǵımarattar «Astana» halyqaralyq qarjy ortalyǵyna, Halyqaralyq «Jasyl» tehnologııalardy damytý ortalyǵyna jáne Halyqaralyq IT-startaptar tehnoparkine beriledi. «Astana EKSPO-2017» UK» AQ kontent jáne is-sharalardy uıymdastyrý departamentiniń dırektory Marat Omarovtyń aıtýynsha, jumystaryn qaıta bastaǵan «Nur Álem» sferasy, art-ortalyq, taqyryptyq pavılon men úzdik tájirıbeler aımaǵyna kelgen qonaqtardyń qatary qazirdiń ózinde kóp. «Barlyq pavılondar tanymaldylyqqa ıe. Týrıstik nysandardy tamashalaýshylardyń sany túski 12.00-ge deıin 3 myń adamǵa jetti. Halyqtyń qyzyǵýshylyǵy áli de basylǵan joq. Olarǵa jańartylatyn energııa kózderi jáne túrleri týraly mol derekter usynyp otyrmyz», dedi ol.
Shara barysynda «Astana EKSPO-2017» UK» AQ qoǵammen baılanys departamentiniń dırektory Sergeı Kýıanov 11 qarasha kúni kórme mańynan ashylady dep josparlanǵan muzaıdynnyń kópshilikke paıdalanýǵa berilýi keıinge shegerilgenin málimdedi. «Muzaıdyndy salýmen jeke uıym aınalysýda. Olar bizden jer telimin jalǵa aldy. Qazirgi tańda muz qatyrý jumysy júrgizilýde. Aýa raıyna baılanysty olardyń josparlary azdap ózgerdi. Jasandy muzdy ustap turý úshin kúndizgi aýa temperatýrasy – 5 gradýs bolýy kerek. Al qazir temperatýra bul talapqa sáıkes kelmeı tur», dedi S.Kýıanov. Onyń aıtýynsha, muzaıdynnyń qashan jumysyn bastaıtyny belgisiz jáne aýa raıyna táýeldi bolyp otyr.
Sýretti túsirgen
Orynbaı BALMURAT,
«Egemen Qazaqstan»
