Bul oraıda óńirimizde kóptegen ıgi sharalar júzege asýda. «Týǵan jerge týyńdy tik!» atty jastar forýmy, Qarasaı aýdanyndaǵy «Batyr babalar» memorıaldy kesheniniń ashylýy osynyń dáleli desek te bolady. Jetisýlyqtar úshin tarıhı kúnde teatr ujymy da qalys qalmaı, «Babalar amanaty» atty teatrlandyrylǵan kórinisti kópshilik nazaryna usynǵan edi. Patrıotızm uǵymyn ulǵaıtýǵa baǵyttalǵan bul «Týǵan jer» baǵdarlamasy bolashaqtyń irgesin qalar árbir jas urpaqqa bıik rýh, sony serpin, jańa beles beretini haq. Sebebi, bul baǵdarlama tól tarıhymyzdy da, rýhanııatymyzdy da keńinen qamtıdy emes pe? Demek, elim, jerim, Otanym degen jas qazaqstandyqtardyń básekege qabiletti, jan-jaqty bolýyna bir qadam jaqyndata túspek.
Sondaı-aq maqalada «Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis» delingen. Búgingi tańda halqymyzdyń rýhanı kemeldenýi men mádenı ósýine yqpal eter, tarıhymyz ben bolmysymyzdan syr sherter óner shańyraǵy teatr men onyń bólinbes bólshegi akterlerdiń qoǵamdaǵy róli zor. Nemis akteri ári teatr rejısseri M.Talhaımer «Eger qoǵamda jara bolyp jatsa, ony teatr emdeýge, ne bári jaqsy bolady dep sendirýge tıisti emes, teatr sol jaqty saýsaǵymen nusqap kórsetýi kerek. Sonda ǵana qoǵam aldyndaǵy paryzy óteledi», degen eken.
Bıyl kórermenderimizge arnap A.Yqsannyń qalamynan týyndaǵan «Haq joly» atty áleýmettik dramany usyndyq. Aıta keterligi bul teatrymyzda sahnalanǵan dinı ekstremızm men terrorızm taqyrybyn qamtyǵan alǵashqy týyndy boldy. Jetisý jurtshylyǵyna usynylǵan áleýmettik dramada búginde kúlli álem halqy úshin bas aýrýy bolyp otyrǵan teris dinı aǵymdar máselesi kóterildi. Musylman men kápirlerdiń arasyndaǵy tartys, qarapaıym qazaq otbasyndaǵy jas jetkinshekterdiń túrli dinı aǵymdardyń jeteginde ketýi, sonymen qatar bul oqıǵanyń ókinishke qaraı qoǵamdyq dertke aınalyp kele jatqandyǵy anyq kórsetiledi. Bir qýanarlyǵy, ózekti máseleni qaýzaǵan spektakldi – tek qala jurtshylyǵy ǵana tamashalaǵan joq. Trýppa Almaty oblysy ákimdigi men oblystyq mádenıet, arhıvter jáne qujattama basqarmasynyń qoldaýymen «Rýhanı kerýen» jobasy aıasynda oblysymyzǵa qarasty 25 eldimekendi aralap keldi. Aq pen qaranyń, jaqsylyq pen jamandyqtyń arasy qas-qaǵym sát ekeni belgili. Osy jaǵdaılardyń tamyryn dóp basqan qoıylym arqyly qanshama jastarymyz kókeıinde júrgen saýalǵa tushymdy jaýap alyp, dástúrli jáne dástúrli emes dinı aǵymdardyń arajigin ajyratqanyna senimdimiz.
Bizdiń bul qarqynmen toqtap qalmasymyz anyq. Jańa maýsymǵa jańa qoıylymdar daıyndadyq. Búgingi tańda Elbasymyzdyń tikeleı qoldaýymen, oblys basshylarynyń bastamasymen úsh qabatty, 510 oryndy jańa teatr ǵımaratynyń qurylysy qarqyndy túrde júrgizilýde. Aldaǵy jyly zaman talabyna saı jabdyqtalǵan, sáýleti kelisken saraıda kórermenderimizben qaýyshatyn kúndi asyǵa kútýdemiz.
Ǵalııa TEMERBAEVA,
B.Rımova atyndaǵy Taldyqorǵan drama teatrynyń dırektory
