Japonııa úkimeti «Fýkýsıma-1» apatty AES operatory – Terso kompanııasyna 900 mlrd. ıen (shamamen 11,5 mlrd. dollar) bóledi.
Úkimettiń málimdeýinshe, bul aqsha kompanııa basshylyǵyna 2011 jyldyń naýryzyndaǵy zilzala men sýnamı týdyrǵan apattar zardaptaryn joıýǵa kómektesetin bolady. Atap aıtqanda, osy qarjydan reaktordy toqtatý jumystary úshin aqy tólenedi. Qarjy úkimettiń japon AES-tary operatorlarymen birlesip qurǵan arnaıy qordan bólinedi.
Tártipsizdikterge ulasqan ereýil
AQSh-tyń Kalıfornııa shtatyndaǵy Oklend qalasynda «Oklentti basyp al» uranymen ótken beıbit sherý sońy tártipsizdikterge ulasty.
Ereýilshiler qala ortalyǵynda vıtrınalardy qıratyp, dúkenderdi tonaı bastaǵan. Polısııamen qaqtyǵys kezinde 80 adam tutqyndaldy. Tártipsizdikterdiń jappaı óris alyp ketýinen qaımyqqan polısııa ereýilshilerdi tynyshtandyrý úshin shuǵyl sharalar qabyldaýǵa májbúr bolǵan.
Shahtada oryn alǵan apat
Qytaıdyń Henan provınsııasyndaǵy kómir shahtasynda bolǵan jarylys saldarynan 4 adam qaza taýyp, 57 adam jer astynda qalǵan.
Apat bolǵan kezde shahtada 75 kenshi jumys istep jatqan eken. Olardyń 14-i óz betterimen joǵaryǵa shyqqan kórinedi. Qazirgi ýaqytta shahtada qutqarý operasııasy júrgizilip, jarylys sebepteri anyqtalýda. 29 qazanda Hýnan provınsııasyndaǵy shahtada da jarylys bolyp, onda 28 kenshi qaza tapqan bolatyn.
Referendýmnan bas tartty
Grekııa premer-mınıstri Iorgos Papandreý, kútkendegige kereǵar, óziniń merziminen buryn otstavkaǵa ketetindigi týraly málimdeme jasaǵan joq.
Onyń esesine óz kabıneti múshelerimen kelissóz júrgizip, Eýroodaq tarapynan bolatyn kómek máselesi boıynsha referendým ótkizýden bas tartty. Sondaı-aq ol elde ulttyq birlik úkimetin qurýǵa da kelisim berip otyr. Jańarǵan úkimet quramyna Antonıs Samaras kóshbasshysy bolyp tabylatyn grek oppozısııasynyń ókilderi de kiredi dep kútilýde.
Flotılııa qarsylyq kórsetpeıdi
Kezekti «bostandyq flotılııasyn» quraǵan eki keme shamamen Gaza sektorynan 150 shaqyrymdaı jerde tur.
Ekspedısııaǵa qatysýshylar olardyń ózderi belgilegen jerine barar aldynda jalpy otyrys ótkizýlerine daýyldyń kedergi keltirgenin málimdegen. «Blokadany buzýǵa» talpynýshylar arasyndaǵy arab jýrnalısi jaǵalaýda ózderin ustap, Gaza sektoryna ótkizbeý qamyn jasaıtyn ızraıldik teńizshilerge qarsylyq kórsetilmeıtinin atap kórsetken. Boljam boıynsha eki kemedegi belsendiler sany 27 adamdy quraıdy.
Saıası daǵdarysty sheshý sharalary
Arab memleketteri lıgasy arab jáne halyqaralyq BAQ ókilderin Sırııadaǵy ahýaldy oqıǵa ornyna kelip, jazyp kórsetýge shaqyrdy.
Damaskige qarsy «aqparattyq soǵys» órtin tutatady degen aıyppen osyǵan deıin Sırııa ókimeti sheteldik jýrnalısterdiń óz aýmaǵynda jumys isteýine tyıym salǵan bolatyn. Jaqynda Sırııa men Arab memleketteri lıgasynyń Mınıstrlik komıteti eldegi saıası daǵdarysty sheshý boıynsha kelisimge qol jetkizdi. Belgilengen jospar boıynsha armııanyń tank bólimsheleri qaladan shyǵarylyp, úkimet pen oppozısııa arasynda kelissózder júrýi tıis.
Áskerı bazadaǵy jarylys
Iraktyń Bakýba qalasynda eki birdeı bomba jarylyp, sonyń saldarynan alty adam qaza taýyp, 23 adam zardap shekken.
Bul aldyn-ala alynǵan málimetter, bizge jaralylardy áli de ákelýde, dep málimdegen Dııala provınsııasy densaýlyq saqtaý departamentiniń baspasóz hatshysy Farıs ál-Azzavı. Jarylys Bagdattan 65 shaqyrym jerdegi áskerı bazanyń janynda, soldattar aılyqtaryn alý úshin kezekke turǵan kezde oryn alǵan.
AQSh basty kıbershpıondardy atady
AQSh úshin ónerkásiptik jáne ekonomıkalyq saladaǵy shpıondyq qaýpi Qytaı men Reseıden týyndaıdy, delingen AQSh qarsy barlaý basqarmasynyń baıandamasynda.
Atalǵan qujatta ónerkásiptik shpıonaj Amerıka qaýipsizdigine eń basty qaterlerdiń biri retinde atap kórsetilgen. Ony jazýshylar ónerkásip salasyndaǵy mańyzdy aqparattar men jańa taldamalardy urlaý maqsatyndaǵy shpıondyqpen ondaǵan elderdiń barlaý qyzmetteri, kompanııalary jáne qarapaıym azamattary aınalysady dep esepteıdi.
Ázerbaıjandyq evreıler nege ashýlandy?
Reseılik jýrnalıst V.Solovevtyń «arsyz minez-qulqy» Ázerbaıjannyń taýlyq evreıleri dinı qaýymdastyǵynyń ashý-yzasyn týdyrdy.
Olar armıan-ázerbaıjan janjalyn Holokostpen salystyrýǵa bolmaıdy dep esepteıdi. Holokost evreı halqyn jekkórýshilik saldary bolyp tabylady. Ázerbaıjanda etnostyq nemese dinı jekkórýshilik joq. Aıta ketý kerek, Máskeý-Baký reısine ulty armıan S.Gıýrdjııannyń otyrǵyzylmaýyn atalǵan jýrnalıst Holokostpen teńegen bolatyn.
Itteri úrgender aıyp tóleıdi
Los-Andjeleste budan bylaı 10 mınótten uzaq ýaqyt úrgen ıtterdiń qojaıyndary aıyppul tóleıtin bolady.
Qala turǵyndarynyń túni boıy úrgen ıtter adamǵa uıqy bermeıdi degen kóptegen shaǵymdaryna baılanysty Los-Andjeles soty osyndaı qaýly qabyldaǵan. Itterdiń úrý uzaqtyǵyn qalalyq baqylaý qyzmetiniń qyzmetkerleri anyqtaıtyn bolady. It qojaıyny birinshi «kinási» úshin – 250, ekinshi joly – 500, al úshinshi joly 1000 dollar aıyppul tóleıtin bolady.
Internet materıaldary negizinde ázirlendi.
