Reseı dúkenderiniń sórelerine on qazaqstandyq ónim óndirýshiniń taýarlary ornalastyryldy. Kazakh Invest alǵash ret bul jobany 2016 jyly iske qosty. Ol kezde qazaqstandyq jetekshi kompanııalar Reseıdiń «Marııa–Ra» jáne «Kırovskıı» óńirlik saýda jelilerine 42 taýar túrin usynǵan bolatyn. «Reseıdegi qazaqstandyq taýarlar aptalyǵy» naýqany bir ýaqytta Novosibir, Ekaterınbýrg, Barnaýl, Kemer, Tomsk jáne Novokýzneskte ótip, otandyq óndirýshilerdiń taýarlaryn 900-deı saýda ornynda tanystyrýǵa jol ashty.
Byltyr Qytaı, Iran jáne Reseı syndy maqsatty iri naryqtarǵa baǵyttalǵan 3 shatyrly brend quryldy. Olar: «Qazaq Organic Food», «KazMeat», «Halal Kazakhstan».
Bıyl otandyq taýarlardy Reseı naryǵynda satý múmkindigine ıe bolý úshin Kazakh Invest Tomskte «LAMA» kompanııalar tobynyń saýda jelilerin: INTERSPAR, SPAR, «FýdCity», «Abrıkos», sondaı-aq, Arhangelskte, Severodvınskte jáne Novodvınskte: «Petrovskıı» jáne «Petromost» sekildi saýda jelilerin iske qosty. Osylaısha, belgili qazaqstandyq brendter Reseıdiń myńnan astam dúkenderine usynyldy.
«Iri kólemdi «Reseıdegi Qazaqstan taýarlarynyń aptalyǵy» naýqany ekinshi jyl qatarynan memlekettiń qoldaýymen ótip otyr. Biz kóbinese aımaqtyq jáne federaldyq telearnalarda jarnamalar uıymdastyryp, qalalarda, saýda ortalyqtarynyń ishinde bılbordtar, promo-palletter, plakattar ilip, aýdıorolıkter qosamyz, qazaqstandyq ónimderdiń dámin tatýǵa arnalǵan kóptegen aksııalar uıymdastyramyz. Eń bastysy, osy jobanyń arqasynda reseılik tutynýshylar qazaqstandyq taýarlardyń sapasyn baǵalap úlgerdi. Aksııa ótkizilgennen keıin saýda jelilerimen jetkizý kelisimsharttarynyń merzimi uzartylyp, qazaqstandyq taýar Reseı naryǵyn sátti jaýlaýda», — dedi «Kazakh Invest» UK basqarýshy dırektory Jálel Bolatov.
Joba aıasynda Reseıdiń saýda jelilerine 70-ke jýyq taýar túri usynyldy. Olardyń qatarynda, shyryndar, shyryndy sýsyndar, lımonadtar, un, makaron ónimderi, shaı, kámpıtter men shokoladtar, maıonezder, ketchýptar, sondaı-aq áıel tazalyǵyna arnalǵan zattar bar.
«Qazaqstandyq taýarlardy RF-tiń saýda jelilerine qosý baǵdarlamasy reseılik seriktestermen baılanys ornatýǵa múmkindik berdi, biz reseılik saýda jelilerine óz ónimderimizdi jetkizý boıynsha kelisimshartqa alǵash ret qol qoıdyq. Bul kórshi eldiń naryǵyna shyǵyp, qazaqstandyq taýardyń eksporttalýyn ulǵaıtýdyń biregeı múmkindigi. Ázirge biz shaǵyn toptamamen jetkizip jatyrmyz, degenmen, eksport kólemin qazirgisinen úsh esege ulǵaıtamyz degen jospar bar. Bundaı jobalar óte tıimdi ári bızneste suranysqa ıe», — dep pikirimen bólisti «Jańa Áljan dıirmen kombınaty» JShS bas dırektory Qanat Tapaev.
О́z kezeginde Jálel Bolatov jobany iske asyrý qazaqstandyq taýarlardyń shetelde tanymaldyǵyn arttyryp qana qoımaı, aımaqtyq brendterdiń de damýyna yqpal etetinine senim bildirdi.
«Pılottyq jobany iske asyrý otandyq taýar óndirýshilerdiń básekege qabiletti ekenin dáleldedi, olar Reseıde óz tutynýshylaryn taýyp ta úlgerdi. «Reseıdegi Qazaqstan taýarlarynyń aptalyǵy» naýqanyn ótkizý «Qazaqstanda jasalǵan» brendimen maqsatty naryqtarda jekelegen brendterdiń tanymaldyǵyn odan saıyn arttyryp, otandyq ónim óndirýshilerdiń básekeles taýarlary men qyzmetteriniń kólemin ulǵaıtatynyna senimdimin», — dep sózin túıindedi Kazakh Invest basqarýshy dırektory.
