«Búgingi tańda Qazaqstan eksporttaýshy elderdiń ishinde 52-shi orynǵa ıe. Álemniń 113 eline 800-den astam óndiristik ónim shyǵaramyz. Biz ýran, mys, tıtan, ferroqorytpa, sary fosfor, un, maqta maıy, bıdaı, zyǵyr tuqymyn jetkizý boıynsha álemdik kóshbasshylarymyz. Sońǵy 5 jylda eksporttyń sapalyq qurylymy edáýir jaqsardy, al shet elderge jetkiziletin ónimniń úshten biri ekonomıkanyń shıkizattyq emes sektoryna tıesili», - dep toqtaldy J. Qasymbek.
Onyń aıtýynsha, 2017 jyldyń 9 aıynyń qorytyndysy boıynsha óńdelgen taýarlar eksporty 22 paıyzǵa artyp, 11,1 mlrd AQSh dollaryn qurady. Ferroqorytpalardy, munaı ónimderin, mys, metall buıymdary, propan men býtan, myrysh jetkizilimderi ulǵaıdy.
«Eksporttyń jalpy kólemindegi óńdelgen taýarlardyń úlesi 32 paıyzdy quraıdy, bul 2012 jylmen salystyrǵanda 7 paıyzǵa joǵary»,- dep naqtylady mınıstr.
Vedomstvo basshysynyń málimetinshe, Qazaqstan alǵash ret elektrovozdardy, teplovozdardy Túrikmenstan, Tájikstan, Ázerbaıjan, Qyrǵyzstan, Ýkraına elderine eksporttaıdy.
«Qazaqstanda jınalǵan avtokólikter Tájikstanǵa, О́zbekstanǵa, Qyrǵyzstanǵa, Qytaıǵa eksporttalady. Jolaýshylar vagondary, relster men qazaqstandyq áskerı-ónerkásip kesheniniń ónimderin eksportqa shyǵarý boıynsha jumystar júrgizilýde. Otandyq óndiristiń transformatorlaryn jetkizý kólemi 60 paıyzǵa ósti. Eksport kólemi 21 mln AQSh dollaryn quraıdy. Jaqynda iske qosylǵan Oral transformator zaýyty óz ónimderiniń 96 paıyzyn shetelge eksporttaıdy. Sondaı-aq, akkýmýlıatorlardyń 1,2 mln danasyn eksportqa ulǵaıtý úrdisi baıqalady, shamamen 35 mln AQSh dollary. Akkýmýlıatorlardy Taıaý Shyǵys, Kavkaz jáne Belarýs elderine eksporttaýǵa kiristi», - dedi Jeńis Qasymbek.
