Qulshylyq ordasy aýyl turǵyndary men mektep túlekteriniń demeýshiligimen salynǵan. Meshittiń saltanatty ashylý sharasyna QR Parlamenti Májilisiniń depýtaty Nurtaı Sabılıanov, Aıagóz aýdanynyń ákimi Baqytjan Baıahmetov, aýdandyq meshit ımamy, demeýshiler jáne aýyl turǵyndary qatysty. Meshittiń irgetasy mamyr aıynda «Aýylym-altyn besigim» atty bastamashyl toptyń uıymdastyrýymen qalanǵan edi. Aýyzbirshiliktiń arqasynda aýyl turǵyndary birden jumylyp, qurylysty 5 aı ishinde salyp shyǵypty. Biri malyn ákelse, endi biri shaıyn demdep úlken kishisi birdeı atsalysyp, asarlatqan.
- Bul árıne, kópshiliktiń qoldaýymen bitken is,-dedi bastamashy top múshesi Muhtar Esqalıev,-al negizgi eńbekti sińirgen osy aýyl azamattary, aýyldyń stýdent jastary. Tipti mektep oqýshylaryna deıin ala jazdaı osy jerde tynbaı eńbek etti. Munyń bárine bas-kóz bolyp, uıymdastyrý jumysyna óte joǵary deńgeıde basshylyq jasaǵan osy aýyldyń týmasy, Almaty qalasynyń turǵyny О́mirserik Núrkebaev degen baýyrymyz. Sol sııaqty Erbol Rahymjanuly Rahymjanovty aıta ketkim keledi.
- Meshittiń ishi jaqsylyqqa toly bolsyn. Eki myńǵa jýyq turǵyny bar Aıǵyz aýylynda HH ǵasyrdyń 80-shi jyldarynan beri eshbir ǵımarat turǵyzylmaǵan edi. Qurylystyń bastalýy aýyl ómirine tyń serpilis, jańa lep ákelgendeı boldy. Jańa meshit elimizdegi birlik pen kelisimdi saqtaýǵa, jastardy tárbıeleýge óz úlesin qosatynyna senimdimin,-dedi QR Parlamenti Májilisiniń depýtaty Nurtaı Sabılıanov,-bul ıgi osy aýyldyń halqynyń uıymshyldyǵyn bereke-birliginiń bar ekenin jáne bir-birin qoldaı biletinin kórsetti. Iаǵnı, elimizdiń bolashaǵyna qosyp jatqan úlesteri aıryqsha. Osyndaı ıgi ister árqashanda jalǵasyn tabady dep oılaımyn.
Aıta ketý kerek, eki júzdeı adamǵa arnalǵan jańa meshittiń ishi zamanaýı talapqa saı salynǵan. Erler men áıelder zaly, ımamǵa arnalǵan bólme, tipti jeke qazandyǵy bar.
- Aıǵyz aýylyndaǵy bul meshit halyqtyń rýhanı jańǵyrýyna, rýhanı órkendeýine úles qosyp, jastardy jaqsy baǵytta tárbıeleýge múmkindik beretin boldy,-dedi Aıagóz aýdanynyń bas ımamy Dýman Nádiruly,-osy meshit salynǵan kezde úlken demeı, kishi demeı barlyǵy birdeı júgirip, aýyldyń halqy óz yntymaǵyn, birligin shynymen de pash etti. Endi basqa da keıbir aýyldarymyzda osyndaı bir rýhanı ordalardyń ashylýyna shyn júrekten tilektespiz.
- Meshittiń qurylys jumystaryna aýylda eshkim de qınalǵan joq. Stýdent jastar men mektep oqýshylaryn eńbek súıgishtikke beıimdelip, ımandylyq baǵytta tárbıelendi,-deıdi aýyl turǵyny, ardager ustaz Qadısha Qabdoldına,- meshittiń ashylýy bir aýyldyń, bir aýdannyń, ıá bir oblystyń ǵana emes, búkil qazaq eliniń toıy, qazaq eliniń maqtanyshy.
Meshitti salýǵa halyqty jumyldyrǵan bastamashyl top músheleriniń aıtýynsha, saýapty shara aýyl turǵyndaryn birlikke jumyldyrsa, jyraqta júrgen azamattardyń týǵan jerge degen ystyq yqylastarynyń nyǵaıýyna sebepshi bolǵan.
- Táýelsizdik alǵannan keıin, dinimiz, tilimiz ózimizdiń erkimizge berilgennen keıin, osy jastarǵa tálim-tárbıe berýde meshitimizdiń atqarar roli óte úlken dep bilemin. Sondyqtan búgin ashylyp jatqan meshitimizge qutty bolsyn aıta otyry, ishi jamaǵatqa tolsyn Alla taǵala tek elimizge jaqsylyǵyn bere bersin dep tilegim keledi,-dedi kásipker Dáýlet Mamyrbekov.
Aıǵyz aýylyn týǵan jerim, altyn besigim dep qasterlep, kómek qolyn sozǵan barsha jandarǵa Mádenıet úıinde qurmet kórsetildi. Olarǵa Qazaqstan musylmandary dinı basqarmasynyń tóraǵasy, bas múftı Erjan qajy Malǵajyuly men Semeı óńiri boıynsha ókil ımam Maqsat qajy Altybaı atynan alǵys hattar tabystaldy. Osy jerde basqa da qaıyrymdylyq sharalar jasaldy. Aýyldyń voleıbol komandasyna demeýshiler atynan sporttyq kostıýmder syıǵa tartyldy. Shara sońynda as berilip, túrli mádenı sharalar ótkizildi.
