Elimiz boıynsha «aq altynnyń» 100 paıyzy óndiriletin Ońtústik sharýalary jańa tehnologııalardy qoldaný men izdenistiń arqasynda maqta talshyǵynyń 10 surypyn jasap shyǵarǵan. Maqtanyń mundaı elıtaly suryptarynyń túsimdiligi 38-40 s/ga deıin jetedi. Maqta daqyly eksporttyq mańyzǵa ıe bolǵandyqtan sharýashylyqtyń osy túrine qyzyǵýshylyq ta artýda, egis kólemi jyldan jylǵa ulǵaıyp keledi. Máselen, bıyl ótken jylmen salystyrǵanda 25 myń gektarǵa artyq, ıaǵnı 134,6 myń gektar jerge shıtti maqta egilgen bolatyn. Sondaı-aq, Maqtaral aýdany ǵana emes, maqta daqylyn ósirýmen oblystaǵy 10 aýdannyń sharýalary aınalysyp keledi. Bıyl 328 myń tonna shıtti maqta jınaldy. Bul ótken jylmen salystyrǵanda 41 myń tonnaǵa artyq. Ortasha túsimdiligi gektaryna 24,5 sentnerden jınalǵan «aq altynnyń» 196,6 myń tonnasy nemese 60 paıyzy tehnıkamen terildi. Maqta alqaptarynda 500 den astam kombaın jumys istedi.
Aıta ketelik, maqta daqylyn ósirý úshin tyńaıtqyshtar men gerbısıtterge memleket tarapynan sýbsıdııa beriledi. Odan bólek, egilgen maqtanyń árbir gektaryna 15 myń teńgeden, al qaıta óńdeý úshin ótkizilgen «aq altynnyń» ár tonnasyna 6 myń teńgeden qarjylaı qoldaý kórsetiledi. OQO ákimi baspasóz qyzmetiniń málimetinshe, jyl basynan beri oblys boıynsha 134,6 myń gektarǵa 2 mlrdqa jýyq, qaıta óńdeý kásiporyndaryna ótkizilgen 140 myń tonna «aq altynǵa» 833 mln teńge sýbsıdııa tólengen.
Ǵalymjan ELShIBAI,
«Egemen Qazaqstan»
