Qoı ústinde boztorǵaı jumyrtqalaǵan aýyl

Qyzylordańyz shóleıtti aımaq qoı. Buıra qumdary buǵyp jatyr. Ańyzaq jeli ókpeńnen ótedi. Seldir ósken sekseýil demeseńiz, tal-daraqtyń da jaı­qalyp turǵany shamaly. Jyńǵyly men torań­ǵy­lynyń arasynan anda-sanda pyr-pyrlap qyrǵaýyl ushady. Sol shóleıtti aımaqpen kún batysqa qaraı júrip kele jatsańyz úlken joldyń boıynan Naǵı Ilııasov degen aýylǵa kez bolasyz. Aýylǵa kirgennen jeruıyqqa tap bol­ǵan­daı kúı kesherińiz anyq. Aınalany gúl kómkerip jatyr. Tap bir gúlden kilem toqyǵandaı. Kók maısasy da jaıqalyp ósip tur. Aǵashtaryna adam qolynyń tıgeni sonadaıdan baı­qalady. О́ıtkeni boıy tip-tik, be­tal­dy ósip turǵan butaq baıqalmaıdy. Aýyldyń qaq ortasynda qaýyzdardan sý atqylap tur. Onyń qasynda Londondaǵy Bıg-benniń kóshirmesi oryn tepken. Naǵılyq aǵaıyn saǵattaryn osy kishi «Bıg-benge» qarap túzeıdi. Máde­nıet úıi ıneden jańa shyqqandaı. Jyp-jınaqy. Muntazdaı taza. Aýylda­ǵy aǵaıynǵa qyzmet etetin ortalyq dúkeni qaladaǵy sýpermarketterden bir mysqal da kem emes. Dúkenmen japsarlas meıramhana ornalasqan. «Ásem» meıram­hanasyna 200 adam bir mezette syıady. Naǵılyq turǵyndar toı-tomalaǵyn osynda ótkizedi. Mektebi de jańa salynǵandaı. Kúrdeli jóndeýden ótken. Sonymen qatar turǵyndarǵa qyz­met kórsetetin naýbaıhanasy jáne bar. Qysqasy, kelbeti kelisken aýyl. Qala tıp­tes dese de bolǵandaı. Al aýylǵa osyn­daı kórik bergen kim? Ol – Abzal Eralıev degen abzal azamat. Qyzylor­dadaǵy kúrish óndirýmen aınalysatyn «Abzal jáne K» seriktestiginiń tór­aǵasy. Osy aýyldyń tóltýmasy. Aýyl bir kúnde osyndaı bola qalǵan joq. Onyń kór­keıýi­ne arnaıy mamandar shaqyryp, adam­dar­dy jumyldyrdy. Aı­nalasy úsh jyl­dyń ishinde Naǵı aýyly adam tany­mas­taı ózgerdi. Oǵan 250 mıllıon teńge kóleminde qarjy jumsaldy. Sóıtip Naǵı Ilııasov aýyly zaman talabyna saı jańǵyrdy. О́tkende Elbasy Syr óńiri­ne sapar jasaǵanda osy aýylǵa soqty. Aýyldy kórip rızashylyǵyn bildirdi. Bul aýyldyń negizi 1931 jyly qa­lanǵan. Jalpy jer kólemi 17549 gek­tardy quraıdy. Búginde aýylda 2235 adam turady. Sondaı-aq, aýylda 5 sharýa qojalyǵy jumys jasap jatyr. Osyndaıda oı keledi: qazaq aýyl­darynan shyqqan kásipker jigitter kóp qoı. Solardyń bári Abzal Eralıevten úlgi alsa. Sóıtip óz aýyldaryn kórkeıtse deısiń. Sonda Qazaqstanda kóriksiz aýyl bolmas edi. Erjan BAITILES. Qyzylorda oblysy.