Qazaqstandyq mádenıet vedomstvosy basshysymen kezdesýge álemdik kınoóndirýshilerdiń tanymal prodıýserleri – M.Hıý (The Walt Disney Company), L.Ýlman (NBC Universal), G.Lı (CBS), V.Mendoza (Paramount Pictures Corporation), M.Valbreht (Warner Bros.), D.Roı (HBO) jınaldy. Qazaqstan tarapynan, sondaı-aq Qazaqstannyń AQSh-taǵy elshisi Erjan Qazyhanov jáne Kınematografııalyq óner men ǵylym akademııasynyń prezıdenti Aıman Musahodjaeva qatysty.
Qazaqstandyq synshylardyń pikirinshe, tanymal Gollıvýd kompanııasy basshylyǵymen kezdesýdiń ózi sáttilik. Álemniń iri kınokompanııalarymen yntymaqtastyq qazaqstandyq kınoóndiriske álemdik deńgeıge shyǵyp, elimizge ınvestısııalar men sheteldik týrısterdiń jańa aǵynyn qamtamasyz etpek.
«Búgingi tańda kıno tek óner túri ǵana emes, sonymen qatar ekonomıka salasynyń anyqtaýyshy. Máselen, «Avatar» fılmi jaryqqa shyqqanda, túsirilimder júrgen Jańa Zelandııaǵa álemniń túkpir-túkpirinen týrıster kele bastady. Keıbir memleketter kınoqyzmet kórsetýdi tabys kózine aınaldyrǵan. Olar Vengrııa, Bolgarııa, Kanada syndy memleketter», dedi mınıstr Arystanbek Muhamedıuly.
Mınıstr Kanadada túsirilip, basty rólde Leonardo Dı Kaprıo oınaǵan «Tiri qalǵan» fılmin mysalǵa keltirdi. Onyń oıynsha, álemdik deńgeıdegi kınokompanııalar ókilderin qazaqstandyq taraptyń usynystary qyzyqtyryp otyr. Osy oraıda naqty qadamdar jasalyndy.
«Biz amerıkalyq kórermenderge «Anaǵa aparar jol» fılmin usyndyq. Ony bul jerde úlken qyzyǵýshylyqpen qabyldady. Qazaqstan kınoóneri halyqaralyq kınofestıvaldarda laıyqty tanystyrylyp, joǵarǵy marapatqa ıe bolǵandyǵyn qalaımyz», dep sózin qorytyndylady mınıstr Muhamedıuly.
Esterińizge sala keteıik, Mádenıet jáne sport mınıstrligi álemniń jetekshi kınokompanııalarymen kınoóndiris salasynda yntymaqtastyq týraly kelissózder ótkizgen bolatyn. Los-Andjeleske issapar jáne «Rýhanı jańǵyrý» baǵdarlamasyn tanystyrý aıasynda mınıstrlik Qazaqstannyń AQSh-taǵy elshiligimen birlese «Spirit of Great Steppe» sharasyn ótkizdi. Birneshe qazaqstandyq fılmniń kórsetilimi, sondaı-aq Halyq ártisi Aıman Musahodjaeva, Dımash Qudaıbergen jáne taǵy basqa óner juldyzdarynyń qatysýymen konsert berildi.
«Egemen-aqparat»
