Ulttyq ekonomıka mınıstri Tımýr Súleımenovtyń aıtýynsha, Strategııalyq jospardyń basty maqsaty — 2025 jylǵa deıin sapaly ári tabysty ekonomıka ósimin qamtamasyz etý, EYDU-ǵa múshe eldermen salystyrýǵa keletin ómir súrý deńgeıine jetý. Jobaǵa sáıkes, jylyna kem degende 4,5-5% deńgeıinde ekonomıka ósimine qol jetkizý josparlanyp otyr, bul Qazaqstanǵa jan basyna shaqqandaǵy JIО́ ósim deńgeıin 2025 jylǵa qaraı 46 100 $ (SQT boıynsha) deıin qamtamasyz etýge múmkindik beredi.
T. Súleımenovtyń aıtýynsha, qujat jobasy túrli deńgeıde talqylaýdyń tórt kezeńinen ótti, sonyń ishinde halyqaralyq uıymdardyń saraptamalyq baǵalaýy da bar.
Máseleni qaraý qorytyndysy boıynsha, Strategııalyq jospar jobasyn QR Úkimetiniń músheleri biraýyzdan qoldap, Memleket basshysynyń qaraýyna jiberdi.
Baqytjan Saǵyntaev bunyń óte mańyzdy qujat ekenin atap ótti. Joba Astana men Almatynyń túrli alańdarynda qaraldy. Sońǵy talqylaý otandyq sarapshylardyń qatysýymen keshe ótkizildi.
«Memleket basshysynyń bıylǵy Joldaýyndaǵy tapsyrmasyna sáıkes, ekonomıkalyq ósimniń jańa modelin qurýdy jáne halyqtyń ál-aýqatyn jaqsartýdy kózdeıtin qujat ázirlendi. Atalǵan qujat elimizdiń negizgi strategııalyq qujaty – «Qazaqstan-2050»-di iske asyrýǵa baǵyttalǵan. Maqsat – 30 ozyq damyǵan el qataryna qosylý», — dedi B. Saǵyntaev.
Osyǵan oraı, jurtshylyqqa durys ári túsinikti tilmen atalǵan strategııalyq qujattyń mánin túsindirý qajet. Baqytjan Saǵyntaev ulttyq ekonomıka mınıstrligine aqparat jáne kommýnıkasııalar mınıstrligimen, ózge de múddeli memlekettik organdarmen birlesip tıisti jumysty qolǵa alýdy tapsyrdy.
