Investısııalar jáne damý mınıstri Jeńis Qasymbek ónerkásiptik qaýipsizdik salasyndaǵy memlekettik saıasatty iske asyrý barysy týraly málimdedi.
«Sońǵy jyldary jasalǵan ahýaldyq taldaý qaýipti óndiristik nysandardyń apatsyz jumysy oń qarqynǵa ıe ekenin kórsetti. Máselen, 2016 jyly apattar sany 2008 jylmen salystyrǵanda 60%-ǵa tómendegen, apat saldarynan zardap shekkender sany shamamen tórt esege qysqarǵan», — dedi Jeńis Qasymbek.
Mınıstrdiń aıtýynsha, jazataıym oqıǵalar sanyn azaıtýdyń negizgi sebepteri — ónerkásiptik qaýipsizdik salasynda qaýipti baǵalaý júıesin engizý, ónerkásiptik qaýipsizdik salasyndaǵy normatıvtik-quqyqtyq bazany jetildirý, ýákiletti organ men baqylanatyn kásiporyndar arasyndaǵy syndarly ózara is-qımyl jasaý arqyly apattardyń aldyn alý jáne oǵan jol bermeý jumystaryn kúsheıtý.
Sonymen qatar, mınıstr jabdyqtardyń, ǵımarattar men qurylystardyń eskirýi, sondaı-aq qaýipti óndiristik nysan ıeleriniń ónerkásiptik qaýipsizdik talaptaryn saqtamaýy óndiristik qaýipsizdik jaǵdaıyna teris áserin tıgizetinine nazar aýdardy. Osyǵan baılanysty, vedomstvo ónerkásiptik kásiporyndardy óndiristi jańǵyrtý men avtomattandyrýǵa yntalandyrý boıynsha jumystar júrgizip jatyr.
«Qazirdiń ózinde ERG, KazZinc sekildi kásiporyndar «aqyldy karer», qyzmetkerlerdi mobıldi basqarý, «aqyldy fabrıka» sekildi Indýstrııa 4.0 elementterin engizý boıynsha jumystar júrgizip jatyr. KazMinerals kásiporyndarynda (Aqtoǵaı jáne Bozshakól) óndiristi dıspetcherleý men ońtaılandyrý júıesi engizilgen. «Altyntaý Kókshetaý» AQ-da onlaın rejımde karerge monıtorıng júrgizý jáne ónerkásiptik ınternet júıesi engizilgen. Júıequrýshy kásiporyndardyń kóptegen kenishterinde qyzmetkerlerdi qulaqtandyrý jáne jaıǵastyrý júıeleri iske asyrylǵan. О́ńdeý ónerkásibinde «SaryarqaAvtoО́nerkásip» JShS, «Jigermunaıservıs» JShS, «Qaınar-AKB» JShS sekildi keıbir kásiporyndarda robottalǵan derbes keshender qoldanylýda», — dedi ınvestısııalar jáne damý mınıstri.
Budan ózge, qazirgi zamanǵy normalar men halyqaralyq tehnologııalyq talaptarǵa sáıkes normatıvtik-quqyqtyq bazany jetildirý maqsatynda «QR keıbir zańnamalyq aktilerine ónerkásiptik qaýipsizdik máseleleri boıynsha ózgerister men tolyqtyrýlar engizý týraly» zań jobasynyń tujyrymdamasy ázirlenip jatyr.
Sonymen qatar, Elbasynyń memlekettik baqylaý jáne qadaǵalaý fýnksııalarynyń aýqymdy tekserisin júrgizý týraly tapsyrmasyna sáıkes ónerkásiptik qaýipsizdik salasyndaǵy fýnksııalardyń 30% qysqartylady.
Qorytyndylaı kele, baıandamashy atalǵan mindetterdi júzege asyrý qazaqstandyqtardyń ómiri men densaýlyǵyn saqtaı otyryp, qaýipti óndiristik nysandardyń apatty jaǵdaılaryn tómendetýge múmkindik beretinin aıtty.
