Kezdesý barysynda Nursultan Nazarbaev Belarýs Respýblıkasy Prezıdentine resmı saparmen shaqyrǵanyna alǵysyn bildirdi. «Bul kezdesýimiz eki memlekettiń arasyndaǵy dıplomatııalyq qarym-qatynastyń ornaǵanyna 25 jyl tolǵan aıtýly datamen tuspa-tus kelipti. Osy jyldar aralyǵynda Qazaqstan men Belarýs Respýblıkasy myqty ekonomıkalyq jáne saıası bazasy bar qarym-qatynas ornatqanyn aıta ketý kerek», deı kele Elbasy Nursultan Nazarbaev Aleksandr Lýkashenkonyń eńbegin joǵary baǵalady. «Memleketińiz úshin sizdiń atqarǵan eńbegińiz zor. Belarýs eliniń aýyl sharýashylyǵy ónimderi men mashına qurastyrý salasyndaǵy jetistikteri álemge keńinen tanylyp úlgerdi», dedi Prezıdent. Nursultan Nazarbaevtyń aıtýynsha, Qazaqstanda 260 belarýs kásiporyny jumys isteıdi.
«Qazaqstan belarýs jerinen aýyl sharýashylyǵy jáne jıhaz ónimderin ımporttaıdy. Osy kezdesý barysynda Qazaqstanǵa BelAZ ónimderin tasymaldaý týraly kelisim shart jasalmaq. Kezdesý nátıjesinde jańa tehnıka jetkizý, tasymal sapasyn arttyrý da damı túsedi dep oılaımyn», dedi Elbasy.
Nursultan Nazarbaev Qazaqstan men Belarýs Respýblıkasy arasyndaǵy dostyq qarym-qatynasty joǵary baǵalady. «Eki memleket arasyndaǵy strategııalyq qarym-qatynas óte joǵary deńgeıge jetti. Memleketterimizdiń arasynda dostyq qarym-qatynas pen yntymaqtastyq ornaǵan», deı kele Prezıdent Belarýs Respýblıkasyna ótken joly kelgende memlekettiń batysynda bolǵanyn esine aldy.
«Búgin ınnovasııalyq jetistikterińizdi arnaıy kórme barysynda tanystyrady ekensizder. Qazaqstan da barynsha ınnovasııalyq damýǵa erekshe kóńil bólip keledi. Iаǵnı, bizde ortaq taqyryp kóp. Árıne, eki memleket arasyndaǵy taýar aınalymynyń deńgeıi tómendep ketken kezder boldy. Biraq bıylǵy jylda bul kórsetkish birden 60 paıyzǵa artty», dedi Nursultan Nazarbaev. Prezıdenttiń aıtýynsha, memleketter arasynda kedendik kedergilerdiń bolmaýy saýda aınalymyn bul deńgeıden de arttyra túsýge septigin tıgize alady.
Nursultan Nazarbaev Qazaqstannyń mýltımodeldi kólik dálizine aınalǵanyn atap ótti. «Búginde Qazaqstan arqyly Belarýs Respýblıkasy men Eýropa elderine jyl saıyn 136 myń taýar konteıneri ótedi. Bul bizdiń memleketimizdegi kólik salasyna kóp paıda ákelip otyr. Sondyqtan bul salanyń bolashaǵy zor dep oılaımyn», dedi Prezıdent.
Belarýs Respýblıkasynyń prezıdenti Aleksandr Lýkashenko Nursultan Nazarbaevtyń belarýs halqyna degen jyly lebizin bildirip júretinin aıtyp, óz eliniń de qazaqstandyqtarǵa degen yqylasy erekshe ekenin aıtty. «Belarýs Respýblıkasynyń Qazaqstanǵa degen syılastyǵy erekshe. Biz Qazaqstannyń kúnnen-kúnge damyp jatqanyna kýámiz», degen Aleksandr Lýkashenko belarýs halqynyń kóbi Qazaqstanda bolyp kórgenin jetkizdi.
«Astana – óte keremet qala. Meniń oıymsha, sizdiń qazirgi jumysyńyz ǵasyrlarǵa qalanatyn, urpaqqa qalatyn eskertkish. Belarýs memleketi Qazaqstannan kóp nárse úırenip jatyr. Astananyń keıbir qurylys elementterin elimizge kóshirip jatqanymyzdy da aıta ketkim keledi», dedi Aleksandr Lýkashenko.
Eske sala ketsek, Elbasy Nursultan Nazarbaev buǵan deıin Belarýs eline 2012 jyldyń mamyr aıynda resmı saparmen barǵan edi. Al Aleksandr Lýkashenko Qazaqstanǵa resmı saparmen 2013 jyly keldi. Nursultan Nazarbaev Belarýs Respýblıkasynyń Prezıdenti Aleksandr Lýkashenkomen osy jyldyń 8 maýsymynda Shanhaı yntymaqtastyq uıymyna múshe memleketter basshylarynyń keńesi aıasynda kezdesip, ekijaqty seriktestiktiń mańyzdy máselelerin talqylaǵan bolatyn.
Gúlnur Qýanyshbekqyzy,
«Egemen Qazaqstan»
Mınsk
