Raýannyń ózi kóp jyldan beri tazy asyraıdy. Joıylyp kete jazdaǵan qazaqy tazyny kóbeıtý, baptaý máselesine qoǵam nazaryn aýdaryp, ulttyq sportty damytý jáıin únemi kóterip júrgen azamattyń biri. Ol bıyl qyrkúıek aıynda Tasqalada ótken «Aýdan kúni» sharasyna da oblystyń ár túkpirinde júrgen ıtbegilerdiń basyn qosyp, tazylar baıqaýyn uıymdastyrǵan bolatyn. Bul jolǵy dala synaǵyna Batys Qazaqstan oblysynyń birqatar aýdandarynan jáne Aqtóbe qalasynan birneshe azamat jeti qazynanyń birinen sanalǵan eń adal dostaryn alyp kelipti. Aqtóbelik Ǵabıt Serikuly («Qyran» tazy) men Aslan Jambyluly («Beıim» tazy), Oral qalasynan Qobylandy Aıtqululy («Jebe» tazy) men Talǵat Faızollauly («Búrkit» tazy) jáne Arsen Erkinuly («Qyran» tazy), Zelenov aýdanynan Asxat Habıbollauly («Qarakóz» tazy), Qaztalov aýdanynan Nurbek Turarbekuly («Naıza» tazy), tasqalalyq Abzal Asqaruly («Býgattı» tazy), Ámirjan Serikuly («Vernyı» tazy), Rınat Farıtuly («Taımas» tazy), Raýan Tańatjanuly («Qundyz» tazy) syndy ıtbegiler sonyń aldynda ǵana qyrbyq qar jaýyp, naǵyz qansonar bolyp jatqan dalaǵa shyǵyp, tazylaryn synap kórdi.
- Kún tumandanyp, bulyńǵyr boldy. Qarǵysynan bosanǵan tazylar áp-sátte en dalany ıemdenip, tóńirekti sharlap ketti. Ásirese Aqtóbe qalasynan kelgen «Beıim» atty tazy talaıdy tańdaı qaqtyrdy. Kóz aldyna kóringen qoıandy eki júz metrden ári asyrmaı, shalyp, qoıan qýyp ketip túlki ustap ákelgen «ónerine» ıtbegiler qaıran qaldy. Qalǵan tazylar da qashqan qoıandy qaqpalap, qaıyryp, júıriktigin, alǵyrlyǵyn kórsetti, - deıdi dala synaǵyn kózimen kórgen Meńdibek Nurbolatuly.
Úsh saǵatqa sozylǵan dalalyq synaqqa Tasqala aýdanynyń kásipkerleri demeýshilik kórsetken. Aýyl azamattary qonaqjaılyq tanytyp, Aqtóbeden arnaıy kelgen qos azamattyń árqaısysyna qazaqy tazynyń bir aılyq kúshigin syıǵa tartty. Ǵabıt Serikuly da márt eken, «Qyran» atty tazysyn oraldyq Talǵat Faızollaulyna baılap ketti.
- Mundaı alys-beris qazaqy tazylardyń taza qandylyǵyn saqtaýǵa, qan jańartýǵa áser etedi, - deıdi Raýan Satybaldy.
Raýan álemdik kınologııa salasynda áli kúnge deıin qazaqy tazynyń bekitilgen tuqymy, ǵylymı standarty joqtyǵyna nalıdy. «Buǵan kináli – eń aldymen ózimizdiń ortaq pikirge, ymyraǵa kele almaýymyzdan» deıdi ıtbegi.
Raýan Tańatjanuly bolashaqta Qazaqstannyń batys óńirin túgel qamtıtyn tazylar baıqaýyn uıymdastyrǵysy keledi. Árıne, oǵan qoldaý, demeýshi kerek. «Búgingi ótken sharanyń ózi Baýyrjan Kımuly, Álibek Náýbetuly, Erlan Hamıtuly, Nurbek Asylbekuly syndy azamattar bolmasa, óz deńgeıinde bolmas edi. Olarǵa alǵysym sheksiz» deıdi ıtbegi azamat.
Qazbek QUTTYMURATULY,
«Egemen Qazaqstan».
Batys Qazaqstan oblysy
Sýretti túsirgen Meńdibek NURBOLATULY
