Palata Eýrazııalyq ekonomıkalyq odaqtyń Keden kodeksi týraly shartty ratıfıkasııalady.
Sharttyń negizgi maqsaty Eýrazııalyq ekonomıkalyq odaqta biryńǵaı kedendik retteýdi qamtamasyz etý bolyp tabylady. Eýrazııalyq ekonomıkalyq odaqtyń Keden kodeksi kedendik retteý salasynda:
- deklarasııa negizinde toltyrylǵan qujattardy keden organyna usynbaı, keden deklarasııasyn elektrondyq túrde berý múmkindigi;
- keden deklarasııasy tirkelgen sátten bastap tórt saǵattyń ishinde taýarlardy shyǵarýdy júzege asyrý;
- keden deklarasııasyn tirkeýge jáne taýarlardy avtomatty túrde shyǵarýǵa baılanysty kedendik operasııalardy keden organdarynyń laýazymdy adamdarynyń qatysýynsyz jasaý múmkindigi;
- Ýákiletti ekonomıkalyq operator mártebesiniń berilýi múmkin zańdy tulǵalardyń sanattaryn kóbeıtý, arnaıy jeńildikterdiń tizimderin, onyń ishinde Eýrazııalyq ekonomıkalyq odaqtyń búkil aýmaǵyndaǵy kedendik baqylaýǵa qatysty arnaıy jeńildikterdiń tizimderin ulǵaıtý sııaqty jańa basym baǵyttardy engizedi.
Senatorlar eki oqylymda qarap, turǵyn úı týraly zańnamaǵa túzetýlerdi qabyldady.
Zańnyń maqsaty Qazaqstan Respýblıkasy Qarýly Kúshteriniń, basqa da áskerler men áskerı qurylymdarynyń áskerı qyzmetshilerin turǵyn úımen qamtamasyz etý júıesin jetildirý bolyp tabylady.
Atap aıtqanda, túzetýlerde áskerılerge beriletin qyzmettik turǵyn úı ornyna bıýdjet qarajaty esebinen arnaıy aqshalaı qoldaý kórsetý qarastyrylǵan. Bul rette, osy turǵyn úı tólemderiniń mólsheri aımaqtyq jáne otbasylyq quram erekshelikterine qaraı saralanatyn bolady.
Qujat qyzmettik turǵyn úı jekeshelendirýge jatpaıtyn kezde (eger ol áskerı qalashyqtarda, shekara zastavalary jáne ózge de jabyq nysandar aýmaǵynda bolsa) áskerı qyzmetshilerge tólenetin, turǵyn úı járdemaqysy men aqshalaı ótemaqy mólsherin esepteý tártibin aıqyndaıdy.
Turǵyn úı tólemderin paıdalanýdyń maqsaty, olardy tóleýdi toqtatý negizderi, áskerı qyzmetshilerdiń otbasy músheleriniń quramy naqtylanady.
Áskerı qyzmetker qaza bolǵan jaǵdaıda, otbasy múshelerine, muragerlerge turǵyn úı tólemderin paıdalanýǵa, birjolǵy aqshalaı ótemaqy túrinde alýǵa kepildik beriledi. Áskerı qyzmetkerdiń ólimine (qaıtys bolýyna) baılanysty birjolǵy aqshany tóleýden bas tartý sharttary bekitilgen.
Jekelegen túzetýler arqyly banktik shottarda jınaqtalǵan turǵyn úı tólemderin maqsatsyz paıdalanýdan qorǵaý máseleleri rettelgen.
Otyrys barysynda senator Darıǵa Nazarbaevanyń Premer-mınıstr B.Saǵyntaevtyń atyna joldaǵan «Qazteleradıo» AQ-ǵa tıesili «OTAU TV»-nyń 1 mıllıonnan astam abonentterin «Caspio HD» jeke kompanııasyna qandaı maqsatpen berilip jatqanyn anyqtaý týraly; senator Narıman Tóreǵalıevtyń balet pen bı ártisteriniń zeınetkerlik jas mólsherin belgileýdi qaıta qaraý týraly depýtattyq saýaldary jarııa etildi.
Otyrys sońynda Senat Tóraǵasy Q.Toqaev senatorlardy kele jatqan mereke - Qazaqstan Respýblıkasy Tuńǵysh Prezıdentiniń kúnimen quttyqtady. Senatorlardyń bastamasy boıynsha zańnamalyq deńgeıde qabyldanǵan bul mańyzdy ulttyq mereke 2012 jyldan bastap merekelenip keledi.
