Prezıdent Tobyl-Torǵaı óńirine jyl saıyn egin oraǵy kezinde keletin, altyn jalatqandaı astyq alqaptaryna baryp, qoly kústengen dıqandar eńbegine kýá bolatyn, olarmen kezdesip, emen-jarqyn áńgime quratyn. Bıyl Elbasynyń joly Qostanaıǵa qońyr kúzde tústi. Elimizdiń astyq derjavasyna aınalǵan Qostanaı óńiri bıyl da qambaǵa 5 mıllıon tonnadan artyq qyzyl dánin quıyp alyp, etek-jeńin jınap, tap-tuınaqtaı bolyp otyrǵan. Elbasy bul saparynda Qostanaı qalasyndaǵy óndiristik jáne áleýmettik nysandardy aralady.
Qostanaı qalasyn jıektep aǵatyn Tobyl ózeniniń jaǵasyna jaqyn aýmaqta shoq-shoq qaraǵaı, qaıyń ósedi. Ushar basyna qaraǵan kisiniń taqııasy túsetin ný qaraǵaı qysy-jazy múlgip turady. Osy qaraǵaıdy irgelep júretin tas jol Elbasy kortejin tennıs ortalyǵyna ákeldi. Bul sport kesheni osydan eki jyl buryn tapsyrylǵan bolatyn. Kólemi 2763 sharshy metr, qurylysyna bıýdjetten 788 mıllıon teńge qarajat jumsaldy. Jańa tıpti sport ǵımaratynda úsh jabyq, úsh ashyq tennıs korty bar. О́tken jyldan beri onyń ashyq jáne jabyq korttarynda birneshe ret respýblıkalyq týrnırler ótti. Elbasy keledi degennen sport mektebiniń dırektory Lıýdmıla Okýneva bastaǵan ujymnyń, tennıs ortalyǵyndaǵy jattyqtyrýshylardyń, jas sportshylardyń kóńili erekshe alaburtqan. Balalar men jasóspirimder sport mektebindegi úzdik sportshylardyń biri 13 jasar tennısshi Ekaterına Sıtnıkova da bul habarǵa qatty qýanǵan. Asyǵa kútken sát te kelip jetti.
Katıa Nursultan Nazarbaevty teledıdardan ǵana kórgen. Elbasymen jaqyn turyp sóılesý, qolyn alý onyń bala qııalynyń jaı ertegisi sııaqtanatyn. Tennıs kortyna kirisimen Nursultan Nazarbaev aınalaǵa rızashylyqpen qarady. At shaptyrym, jaryq, bıik kort. Ol ózin kútip turǵan sport mektebiniń úrkerdeı úzdik tennısshilerine jaqyndady.
– Qostanaı tennıstiń jabyq kortyna zárý bolatyn. Bul óńirdiń qysy uzaq, qatal, jazy qysqa. Munda buryn qys mezgilinde jattyǵý úshin eshteńe bolmaıtyn. Mine, senderde endi tennıs korty, kúshtilik sport túrleriniń akademııasy, jabyq muzaıdyny, fýtbol stadıony – bári bar. Qysta da jattyǵýlar úzilmeıdi. Sport – keremet is, onymen bala kezden aınalysyńdar, sonda ómir boıy densaýlyqtaryń jaqsy bolady, sporttan qol úzbeıtin bolasyńdar, – dedi Nursultan Nazarbaev. Elbasy sózin aıaqtaǵanda balalardyń aldyńǵy jaǵynda turǵan Ekaterına Sıtnıkova Nursultan Nazarbaevtyń kelgenine balalardyń barlyǵy óte qýanyshty ekenin jáne óziniń sporttaǵy jetistikterin aıtyp berdi.
– Men 2016 jyly respýblıkalyq týrnırde úshinshi oryn, bıylǵy ótken respýblıkalyq eki týrnırde de ekinshi oryndy ıelendim. Tennısti óte jaqsy kóremin. О́skende elimizdiń namysyn qorǵaıtyn bolamyn, álemdik jarystarda Qazaqstannyń týyn jelbiretýdi armandaımyn jáne soǵan qol jetkizemin, – dedi Katıa batyldana sóılep. Armany asqaq náp-názik qyzdy Elbasy óz perzentindeı meıirlene baýyryna qysty.
– Teledıdarda kórgenimde Elbasynyń kózinshe eshqandaı sóıleýge bolmaıdy dep oılaıtynmyn. Al ol bizben kezdeskende qysylǵan joqpyn, óıtkeni ol kisiniń júzi óte meıirimdi eken, meni qushaqtap, arqamnan qaqqanda týra atam sekildi boldy, – deıdi Katıa. Elbasy balalarǵa óziniń de tennıspen aınalysqanyn aıtty. Elbasynyń: «Men de tennıspen aınalystym. Densaýlyǵy myqty jáne bilimdi adam ǵana ómirde jetistikterge qol jetkizedi. Sondyqtan jastar sportpen aınalysýy, dostasýy kerek» degen sózi balalardyń kókeıinde jattalyp qalatyny kúmánsiz.
Ákesiniń aǵasy, áýletindegi bar bala «ata» dep ataıtyn Gennadıı Vedıaev Katıanyń alty jasynda qolynan jetektep, tennıs seksııasyna aparǵan. Dáriger Gennadıı Petrovıchtiń ózi de sportshy, jetpisten assa da súıikti mamandyǵy dárigerlikti de, súıikti isi voleıboldy da tastaǵan joq. Tennıs kishkentaı Katıaǵa da erekshe unap, alty jyldan beri sport mektebiniń úzdik shákirtine aınaldy. Mektepte de belsendi, jaqsy oqıdy.
Sol kúni Elbasynyń tennıs kortyna barǵanyn, balalarmen arada bolǵan áńgimesin, onyń aldynda Katıanyń jáne jas tennısshiler Sanjar Buqanovtyń, Dıana Sháripovanyń sóılegenin buqaralyq aqparat quraldary arqyly búkil el estip, bildi.
– Qýanǵannan jylaı berippin. Qyzymnyń ustazdary, jattyqtyrýshylary, týystar, dos-jarandar birinen keıin biri telefon soǵyp, quttyqtap jatyr. Tipti Reseıdegi týystarymyz ben tanystarymyz da telefon shaldy ǵoı. Kishkentaı balapanym Katıaǵa qanat bitkendeı boldy. Qazir jattyǵýyna da, sabaǵyna da burynǵydan da yjdaǵatty bolyp aldy. Ol Elbasy aldyndaǵy sózin ómirde oryndaýdy armandaıdy, – deıdi Katıanyń anasy Elena. Sıtnıkovter Elbasynyń jas tennısshilermen suhbattasyp turǵan jáne Katıany baýyryna tartqan sáti beınelengen sýretterdi úlkeıtip, ramkaǵa salyp, tórine ilip te úlgerdi.
Elbasynyń kelý sátin beıneleıtin sýretter tennıs ortalyǵyna da ilinipti. Jattyǵýǵa kelgen sportshylar men tennıs áýesqoılary oǵan qaraǵan saıyn Qostanaı tennısiniń jarqyn bolashaǵy sáýle shashqandaı bolady.
Názıra JÁRIMBET,
«Egemen Qazaqstan»
QOSTANAI
