Keshe Beıbitshilik jáne kelisim saraıynda jastar shyǵarmashylyǵynyń «Shabyt» XIV halyqaralyq festıvali óz jumysyn aıaqtady.
Bıylǵy jastar saıysy qaı jaǵynan da kóptiń kóńilinen shyqty dep aıtýǵa bolady. «Baǵy jansyn jastardyń, Arystandaı aıbatty, Jolbarystaı qaıratty, Men jastarǵa senemin!» – dep aqyn jyrlasa, mine, sol balǵyn júrekter ózderiniń kesteli oılary men tylsym syrlaryn osy joba arqyly jan-jaqty jaıyp salǵanyna jınalǵan jurtshylyq kýá boldy. Astanalyq Dana Rysbekova men Darııa Sádýaqasova sırk ónerinen kásibı sheberlikterin kórsetse, Marjan Arapbaeva, Rústem Júginisov pen «Eligaı» hor toby, Jámıla Jarqymbaeva ónerleri kópshilikti súısintken. Ármen qaraı da alty atalym boıynsha jarys kórigi qyza túsken. «Úzdik ádebı shyǵarma», «Beıneleý óneri», «Estrada janry», «Halyq ánderi», «Klassıkalyq ánder», «Baıan-akkardeon» nomınasııalarynan baq synasqan ónerpazdardyń bıyl óte kóp bolǵany kóńilge qýanysh sezimin uıalatty.
Prezıdenttik mádenıet ortalyǵynda ulttyq ánder atalymyndaǵy «Dombyra» jáne «Dástúrli ánder» nomınasııasynyń I kezeńi ótti. Ol eki kúnge sozyldy. «Baq shaba ma, bap shaba ma» demekshi, úkilerin jelbiretip jarysqa 42 ónerpaz qatysty. Ár qatysýshy 3 kúıden oryndady. I kezeńde qatysýshylar tarıhı kúıdi, ekinshisinde Mahambettiń «Jaýǵa shapqan», al úshinshisinde Qurmanǵazynyń «Aqbaı», Dáýletkereıdiń «Topan», Táttimbettiń «Bestóre», «Bozaıǵyr», «Saryjaılaý» kúıleriniń bireýin tańdap oryndady.
Osylarmen qatar Qazirgi zaman murajaıynda beıneleý óneri men qoldanbaly óner boıynsha baıqaý ótti. Kórmege túrli-tústi boıaýlar, zergerlik buıymdar, pannolar jáne aǵashtan, shynydan, taǵy da basqa buıymdardan jasalǵan qolóner zattary, barlyǵy 116 eńbek qoıylǵan.
«Dástúrli ánniń» II kezeńinde 43 qatysýshydan 17-si, al «Dombyra» nomınasııasy boıynsha 42 qatysýshydan 15 kúıshi ǵana baq synady. Baıqaý qorytyndysy boıynsha 8 qatysýshy arnaıy dıplommen marapattaldy. Úkitaı Ernııazov úshinshi oryndy, Bolat Doldashev – ekinshi, al birinshi oryndy Erjan Jamenkeev ıelendi. Bas júlde Azamat Shynarovqa buıyrdy.
«Beıneleý óneri» nomınasııasyna qatysýshy jas sýretshilerdiń kórme-baıqaýynan da kókeıge kóp nárse túıýge bolady. «Dekoratıvtik-qoldanbaly óner» baıqaýynyń I kezeńine 16-35 jas aralyǵyndaǵy 119 adamnyń qatysýynyń ózi bul ónerge degen jastardyń súıispenshiligin ańǵartqan. Elimizdiń 13 óńirinen, sondaı-aq Qyrǵyzstannan, Mońǵolııadan, Reseıden de daryndy jastar kelip qatysypty. Kórmege sýretshilerdiń, kıim-keshek dızaınerleriniń, oqytýshylardyń, joǵarǵy oqý orny stýdentteriniń, tipti, mekteptiń joǵary synyp oqýshylarynyń da jumystary qoıylǵan.
Munda birinshi oryn – Botagóz Zeınelhanǵa, ekinshi oryn – Baýyrjan Dosjanovqa, al úshinshi oryn Lıýdmıla Sobolevaǵa berildi. Hakimjan Naýryzbaıdyń ataýly dıplomyn Aqtaý qalasynan kelgen Sáýle Kýlchıkova alsa, Naǵıma О́tepova atyndaǵy arnaıy dıplom astanalyq Ánýar Shaımergenovke tabystaldy.
Prezıdent Kýbogyna astanalyq dástúrli ánshi Syrym Muhamedjanov ıe boldy .
Nurzada KÚMISBEK.
____________________
Sýretterdi túsirgen Orynbaı BALMURAT.
