Aıtalyq, Prıshahtınskidegi búldirshinderge arnalǵan 360 oryndyq «Odareshka» balabaqshasy Elbasy kúnine oraı uıymdastyrylǵan erekshe syılyqtardyń biri boldy. Memleket-jekemenshik áriptestik aıasynda ashylǵan mektepke deıingi mekeme Prıshahtınskidegi 23 shaǵyn aýdanda ornalasqan. Balabaqsha quryltaıshysy Gúlnar Smaılovanyń tájirıbesindegi bul tórtinshi balabaqsha. Qaraǵandylyq kásipkerlerge memleket-jekemenshik áriptestik zor múmkindikter usynǵany ras. 2015 jyly 1000 orynǵa arnalǵan tórt jekemenshik balabaqsha ashsylsa, 2016 jyly kásipkerler osyndaı 10 baqsha ashqan. Al bıylǵy jyly solardyń qatary 19-ǵa artqan.
«Odareshka» balabaqshasynyń ǵımaraty kúrdeli jóndeýden ótip, zamanaýı jabdyqtalyp, qazirgi kúni tipti, 400-ge tarta balaǵa esigin ashqan. Barlyq jaǵdaı jasalǵan ǵımarattyń syrty da, ishi de kóz tartarlyq. Onyń ústine, qalanyń Ońtústik-Shyǵys bóligindegi «Aqerke», «Armashka» jáne Maıqudyqtaǵy «Aqjarqyn» balabaqshalary da Gúlnar Smaılovanyń eńbegi. Kásipker damytý-tárbıe prosesin júrgizip qana qoımaı, balabaqshalarda tuzdy shahtalar, robototehnıka kabınetteri, shyǵarmashylyq sheberhanalar uıymdastyryp, balalarmen logoped jáne psıholog mamandarynyń da jumysyn jan-jaqty qarastyrǵan.
Quryltaıshynyń aıtýynsha, 1975 jyldary «Ýlybka» dep atalǵan balabaqshanyń qurylysy salynǵanyna qyryq jyldan astam ýaqyt ótken. Keıinnen toqsanynshy jyldardyń qıyndyǵy kezinde balabaqsha jabylyp, «Solnyshko» balabaqshasyna qosylǵan. Ata-analardyń tóleıtin aqshasynyń joqtyǵynan, tamaqtandyrý jaıy da máz bolmaýy sebepti birinen keıin biri jabylǵan mektepke deıingi mekemelerdiń ǵımarattary bos qaldy. Sodan beri, jıyrma jyldan astam qoldan-qolǵa ótken ǵımarat bul kúni búldirshinderge esigin qaıta ashty.
Atalmysh nysannyń ashylý saltanatyna óńir basshysy Erlan Qoshanov qatysty.
– Mereke qarsańynda Prıshahtınsk turǵyndary úshin bul jaqsy syı. Búgin shynymen de qýanyshty kún. Birinshi kezekte búldirshinderdiń ata-analaryn osyndaı tamasha balabaqshanyń ashylýymen quttyqtaǵym keledi. Osy jerde elimizdiń bolashaǵy ósip-jetiledi. Balalaryńyzdyń bolashaǵy zor bolsyn. Al, biz – Elbasynyń tapsyrmasyn osyndaı joǵary deńgeıde oryndaýǵa tyrysamyz, – dedi ákim.
Bıyl, jalpy Prıshahtınskide barlyǵy úsh balabaqsha ashylǵan. Eger jyl basynda kezektegi balalar sany 1000-ǵa tarta bosa, memleket-jekeshelik áriptestik aıasynda kezektegi balalar sany 400-ge azaıǵan.
Mıras ASAN,
«Egemen Qazaqstan»
Qaraǵandy oblysy
