– Biz bilim salasynda, ıntellektýaldy ult qalyptastyrýda damý ústinde ekeninimizdi kórsetýimiz kerek. Álemde adamı damý ındeksiniń reıtınginde Qazaqstan 56-orynda keledi. Bul damýdyń joǵary satysyndaǵy elder qataryndamyz degen sóz. Oǵan jas urpaqtyń da úlesi mol. Bizde óziniń jetistikterimen oblys dańqyn asyryp júrgen jastarymyz bar. Balalar tabysy – olardyń ustazdarynyń eńbegi, jetistigi dep bilemiz», dedi saltanatta sóz sóılegen oblys ákimi Arhımed Muhambetov.
Birneshe jyl qatarynan Qostanaı oblysynyń olımpıadalyq komandasy elimizde kósh bastap júr. Bıyl oqýshylar respýblıkalyq olımpıadalardan 24 medal alyp keldi. Al osydan 4 jyl buryn júldeli orynnyń sany 7 ǵana bolatyn. Sabaqta, ónerde, sportta jetistikke jetip júrgen mektep oqýshylary sóz aldy. Mysaly, qazaq-túrik lıseıiniń 11-synyp oqýshysy Varıs Ýrazbahten bıyl hımııa páni boıynsha respýblıkalyq olımpıadada kúmis júldege ıe boldy.
– Men 7-synyptan bastap hımııa páni erekshe qyzyqtyrady, bul boıynsha túrli jarystarǵa qatysyp kelemin. Respýblıkalyq olımpıadalarda myqty básekelester kóp, oza shaýyp júlde alý ońaı emes, – deıdi Varıs.
«Trıýmf» syılyǵyn tapsyrýda ustazdar da eńbeginiń nátıjesin kórgenine qýandy. Sáýle Moldabaeva oblys ortalyǵyndaǵy «Ozat» daryndy balalar mektebinde tarıhtan sabaq beredi. Bıyl onyń shákirti Arýjan Kóbenova tarıh páninen ǵylymı jumys boıynsha respýblıkalyq olımpıadanyń qola júldegeri atandy.
– Tuńǵysh Prezıdent kúni syılyq alý men úshin úlken maqtanysh. Arýjan «Batys Eýropa aýmaǵyndaǵy qazaq dıasporasy» atty ǵylymı jobany qorǵady. Taǵdyr tálkegimen sol jaqty meken etip qalǵan qandastarymyz jáne qazir kóptegen túlekter oqýǵa sonda barady. Biz elder arasyndaǵy óz ara baılanysty zerttep, mádenıetterdi túsinýge talpyndyq, – deıdi Sáýle.
Saltanatty jıynda oblys ákimi men oqýshylar arasynda emen-jarqyn áńgime órbidi. Aımaq basshysyna olar qoıǵan suraqtar bilim berý, tárbıe salasyndaǵy ózekti máselelerdi de qamtydy. Mysaly, gir sportynan qyzdar arasynda oblystaǵy jalǵyz sport sheberi Iаna Lıtvınova oblys ákiminen:
– Aýyldaǵy sportshy balalar úshin oblysta sport mektep-ınternaty bola ma?, – dep surady.
– О́te jaqsy suraq. Rasynda, bizde sportshylarǵa arnalǵan mektep-ınternat joq. Biz ony memleket-jekemenshik áriptestigi deńgeıinde qarastyratyn bolamyz. Osyndaı tásilmen bıyl kásipker Mahmut Tursynov kúsh qoldanylatyn sport túrleri akademııasyn salsa, keler jyly oblysta 50 metrlik basseın paıda bolmaq. 3000 oryndyq muz saraıyn salýdy josparlap otyrmyz. Aldaǵy ýaqytta sen aıtqan máselelni de oılastyratyn bolamyz. Sport ǵımarattaryn salý bar da, oǵan balalardyń qoljetimdiligin qamtamasyz etý bar. Qoljetimdilik sporttyń buqaralyǵyn damytýǵa múmkindik jasaıdy, – dedi Arhımed Begejanuly.
Oqýshylardyń suraqtaryna oraı Arhımed Muhambetov tabysqa jetýdiń basty kepili – eńbek ekenin aıtyp, oǵan naqty mysaldar da keltirdi. Ol taıaý jyldary «Reseıdiń úzdik jyl kásipkeri» atanǵan Serikbaı Bısekeevtiń «О́zińdi óziń jasa» kitaby týraly aıtty. Alǵa maqsat qoıyp, armanyna jetýge tynymsyz umtylǵan jas qana ómrde bıikterdi baǵyndyra alady. Oǵan Elbasy Nursultan Nazarbaevtyń ómiri de, jastarǵa arnalǵan sózderi de tolyq dálel bolady.
«Trıýmf» syılyǵy tapsyrylyp bolǵannan keıin oqýshylar men ustazdar ákimmen eskertkish sýretke tústi.
Názıra JÁRIMBET
«Egemen Qazaqstan»
QOSTANAI
Sýretti túsirgen Baǵdat AHMETBEKOV
