Áýelgi sózdi Jambyl oblysynyń ákimi Kárim Kókirekbaev alyp, Elbasynyń eren eńbegine toqtaldy. Ákim óz sózinde Memleket basshysynyń qamqorlyǵyn jambyldyqtardyń da jete sezinip otyrǵanyn jetkizip, óńirde túrli jobalardy iske asyrýda Elbasynyń mańyzdy rólin atap ótti. Al Memleket tarıhy ınstıtýtynyń dırektory, tarıh ǵylymdarynyń doktory, professor Búrkitbaı Aıaǵan Elbasynyń ár jyldary jazǵan tarıhı-saıası eńbekteriniń mańyzdylyǵyn aıtty. Ǵalym óz sózinde Elbasynyń árbir eńbegi qazaq eliniń damý baǵdaryn aıqyndap, keleshekke jol siltep otyrǵanyn da jetkizdi. Sonymen qatar, Qazaqstannyń eńbek sińirgen qaıratkeri Qaınar Oljaı óziniń jýrnalıstik qyzmetindegi Elbasynyń shet memleketterge issaparyn jazý barysyndaǵy este qalarlyq oqıǵalarymen bólisti.
Jazýshy, jýrnalıst Aıtbaı Sáýlebektegi Elbasy ómirinen kitap jazý qyzyq ári qıyn ekenin aıta kele, ózi Elbasy týraly kitap jazý barysynda mol maǵlumattarǵa qanyqqanyn aıtyp ótti. Elbasy alǵash eńbek jolyn bastaǵan Qaraǵandy oblysynyń Temirtaý qalasynan Máskeýge deıin barǵanyn, sol sapary barysynda Elbasy týraly kóptegen mańyzdy derekter kezdestirgenin áńgimeledi.
Jalpy, Elbasy qamqorlyǵymen «Bolashaq» baǵdarlamasy aıasynda elimizdiń myńdaǵan jastary álemniń aldyńǵy qatarly joǵary oqý oryndarynda bilim alyp keledi. Elbasynyń bul bastamasy talaı jastyń tuǵyrǵa qonýyna yqpal etkenin aıtqan «Bolashaq» halyqaralyq stıpendııasynyń ıegeri, Qazaqstan Jastar Odaǵy «Serper» syılyǵynyń laýreaty Qanat Áýesbaı táýelsiz qazaq eli úshin aldaǵy ýaqyttarda eńbek etetinin jetkizdi.
Hamıt Esaman,
«Egemen Qazaqstan»
Jambyl oblysy
