Jıyndy júrgizgen Almaty qalasy ákimi apparatynyń «Qoǵamdyq kelisim» KKM dırektory Jannat Murynova óz sózin basqosýǵa jınalǵan zııaly qaýymǵa Almaty qalalyq onomastıka jónindegi komıssııasynyń el Úkimeti janyndaǵy onomastıka komıssııasynyń kelisimimen Fýrmanov kóshesin N.Nazarbaevtyń atyna aýystyrý týraly sheshimin oqyp, súıinshi suraýdan bastady.
Ulttyq kitaphana dırektory J.Seıdýmanov búkil dúnıe júziniń kitaphanalar júıesimen baılanystyń nyǵaıyp kele jatqanyn, álemniń qaı eline, qandaı Ulttyq kitaphanasyna barsa da, rýhanı mura men mol kitap qoryna jetekshilik jasap otyrǵan basshylar tarapynan Qazaqstan Prezıdentiniń jasampaz isine qyzyǵa qaraıtynyn, Prezıdent N.Nazarbaevtyń eńbekterin nemese Elbasy týraly jazylǵan kitaptardy syıǵa tartýyn suraıtyn ótinishterdiń jıi jasalatynyn aıtty. Prezıdenttiń kitaptary Qazaqstandy mekendeıtin ulttardyń kópshiliginiń tiline aýdarylǵan, sondyqtan N.Nazarbaev tolyqqandy shyǵarmalarynyń bútin kolleksııasy jınaqtalǵan birden-bir avtor bolyp esepteledi.
Almaty qalasyndaǵy «Irnyhas» osetın mádenı aǵartýshylyq ortalyǵynyń tóraǵasy Qazbek Mamsýrov táýelsizdik jyldarynan bergi ózi súısinip, baǵalaǵan Prezıdenttiń birneshe eńbeginiń mazmunyn tarqatty. Al Almatydaǵy koreı ulttyq ortalyǵy tóraǵasynyń orynbasary, tarıh ǵylymdarynyń doktory, professor Georgıı Kan ózi úshin jáne ózi sekildi Qazaqstandy Otanym dep tanıtyn taǵdyrlastary úshin Tuńǵysh Prezıdent kúniniń mán-mazmuny aıryqsha ekenin tolqı otyryp jetkizdi. Tuńǵysh Prezıdent kúni – jaı saıası ataýly kúnnen áldeqaıda joǵary turatyn jalpyulttyq mereke. Prezıdent kúnin tek Qazaqstan ǵana emes, sonaý 1855 jyldan beri AQSh halqy, Islandııa jurty, sondaı-aq Botsvana, aǵylshyn monarhııasynyń ataýly kúnin Ulybrıtanııa, Korol kúnin Gollandııa, taǵy basqa álem elderi de baıyrǵy kezeńderden beri toılap, jalpyulttyq merekege aınaldyrǵan. Tuńǵysh Prezıdent kúnin atap ótýdiń qazaqstandyq dástúriniń qalyptasqanyna da bıyl, mine, altynshy jyl. Koreı ulttyq ortalyǵy jetekshileriniń biri G.Kan Prezıdent týraly tebireniske toly júrekjardy sózin Abaıdyń 39-qarasózimen qısyndy baılanystyrdy. «Men Abaıdy oqymaı bir kún de kóz ilgen emespin. Barlyq suraǵymnyń jaýabyn Abaıdan tabamyn. Abaı Elbasy týraly tolǵamyn baıaǵyda, ózi ómir súrgen zamanda-aq 39-qarasózinde aıtyp ketken. «Ol zamanda el basy, top basy degen kisiler bolady eken. Kósh-qondy bolsa, daý-janjaldy bolsa, bılik solarda bolady eken. О́zge qara jurt jaqsy-jaman ózderiniń sharýasymen júre beredi eken. Ol el basy men top basylary qalaı qylsa, qalaı bitirse, halyqta ony synamaq, birden birge júrgizbek bolmaıdy eken. «Qoı asyǵyn qolyńa al, qolaıyńa jaqsa, saqa qoı», «Bas-basyńa bı bolsa, manar taýǵa syımassyń, basalqańyz bar bolsa, janǵan otqa kúımessiń» dep maqal aıtyp, tileý qylyp, eki tizgin, bir shylbyrdy berdik saǵan, bergen soń, qaıtyp buzylmaq túgil, jetpegenińdi jetiltemin dep, jamandyǵyn jasyryp, jaqsylyǵyn asyramyn dep tyrysady eken. Ony zor tutyp, áýlıe tutyp, onan soń jaqsylary da kóp azbaıdy eken. Bári óz baýyry, bári óz maly bolǵan soń, shynymenen jetesinde joq bolmasa, solardyń qamyn jemeı qaıtedi?».
Is-sharanyń ekinshi bóliminde Almaty qalasy QHA Hatshylyǵy men Almaty qalasy ákimi apparatynyń «Qoǵamdyq kelisim» KMM eldiń órkendeýi jolynda adal qyzmet etip, qoǵamdyq kelisim men ultaralyq birliktiń nyǵaıýyna qosqan úlesi úshin etnıkalyq birlestikterdiń birqatar ókilin Alǵys hatpen marapattady. Sońynan Qazaqstan Respýblıkasynyń Tuńǵysh Prezıdenti jaıly kitap kórmesi men fılm kórsetildi.
Aıgúl AHANBAIQYZY,
«Egemen Qazaqstan»
ALMATY
