«Astana» komandasy osy kezge deıin toptyq kezeńde óner kórsetip kelgenine rıza edi ǵoı. Endi jyl saıynǵy tájirıbıeden elordalyq ujymnyń beli bekip, býyny qataıa túskeni kórinedi. Top jaryp shyǵyp, kelesi kezeńge ótý qol jetetin mejege aınaldy. Alaıda, sońǵy týrlarda soǵylmaı qalǵan goldar men alynbaı ketken upaılar ózektegi ókinishti odan ári oıyn aldynda órteı túsýde. Árıne, qyjyldy ketiretin tek qana bir sheshim bar. Ol – sońǵy oıynda jeńisti julý. Teń nátıjeniń ózi bizge esh kómek bere almaıdy.
Átteń, óz alańymyzda «Vılıarrealmen» teń túskenimizde jaǵdaı ózgeshe bolar edi. Oıynǵa degen taktıkada basqa arnaǵa burylyp, «Slavııanyń» alańyndaǵy oıynda jeńis bizge emes, kerisinshe alań ıelerine kerek bolatyn-dy. Ondaı jaǵdaıda oıynnyń tuzy jeńildeıtin. Qorǵanysqa bekem bolyp, jaýapty shabýyldy kózdeıtin edik. Al endi Stanımır Stoılovtyń oıy múlde basqa. Jeńýdiń amalyn qarastyrý qajet. Osy úshin de bolgarııalyq bapker komandany apta buryn Chehııaǵa alyp keldi. Kúnige teorııalyq jattyǵý jasap, «Vıktorııa» Jıjkov komandasymen joldastyq match ta ótkizdi. Sol oıynda «Astana» shabýyldyń shebin shyńdap, standartty jaǵdaılardy bir pysyqtap alypty. Oıyn aldyndaǵy baspasóz máslıhatynda bapkerdiń aıtqany da osy boldy.
- Bul sońǵy oıynda bizge tek qana jeńis kerek. Jigitter ishki chempıonatta oıyndary joq bolǵandyqtan apta buryn kelip osynda jattyqty. Bul bizdiń oıynǵa degen daıyndyǵymyzdy sál de bolsa jaqsarta tústi. Qolymyzdan kelgendi esh aıamaı oınasaq, kózdegen nátıjege jetip te qalarmyz. Barlyǵyn oıyn kórsetedi.
Chehııalyq klýbtar men qazaqstandyq ujymdardyń arasyndaǵy eýrokýbok aıasyndaǵy oıyndarǵa kóz júgirtsek, chehtardyń ústem bolǵanyn anyq baıqaımyz. Burynnan kári qurlyqta óner kórsetetin Chehııa komandalary mol tájirıbıege ıe. Mysaly, «Astana» Eýropada nebári 46 kezdesý ótkizse, «Slavııa» 150 oıyn oınaǵan. Salystyrsańyz úsh ese kóp ekenine kózińiz jetedi. Alaıda, taǵy bir máselege toqtaıtyn bolsaq, «Astana» bıylǵy maýsymda syrttaǵy oıyndarda jeńiske jete bastady. Aldymen, «Spartak» Iýrmalany, sosyn «Makkabıdi» jeńdi. Demek, tek úıde ǵana emes, túzde de upaı alatyn jaǵdaıǵa jetkenimiz. Al osy toptyq kezeńniń ózinde «Astanamyz» syrttaǵy oıyndarda mindetti túrde gol soǵyp júr. Bálkim úshinshi oıynda da dástúrden aınymaıtyn shyǵar degen úmit basym.
Endigi másele sol soǵylǵan golymyz jeńisti bola ma? Gol soǵatyn fýtbolshymyz shynyn aıtqanda ekeý ǵana. «Astananyń» Eýropa lıgasyndaǵy sońǵy 7 golyn soqqan da osy ekýi. Tvýması men Kabananga. Alaıda, sońǵy suqbatynda Patrık «komandadaǵy keıbir jigitterdiń súreńsiz oıyny bolmaǵanda «Vılıarrealdy» jeńip keter edik», depti. Bul sóz Igor Shıtov sekildi qorǵaýshylarymyzdyń shambaıyna batyp ketkeni anyq. Psıhologııalyq jaǵdaıdy rettep, komanda ishindegi kóńil-kúıdi jiti qadaǵalaıtyn Stanımır bapker bul máseleni beı-jaı qaldyrmas. Eger qaldyrsa, komandadaǵy fýtbolshylar erteń alańda kórpeni árkim ózine tartyp, oıynnyń berekesin qashyratyny sózsiz. Demek, komanda ishinde barlyǵy da 100 paıyz keremet dep aıtý qıyn. Deı turǵanymen, «Astana» jeńiske jetip, Eýropa lıgasynyń pleı-off kezeńine shyqsa, onda bul da bir qazaq fýtbolynyń tarıhı jeńisi bolady. Osyǵan deıin qazaqstandyq klýbtar mundaı deńgeıge deıin shyǵyp kórmegen edi. Sonda «Slavııanyń» «Astanadan» artyq jeri qaısy deısiz ǵoı. Árıne biz tájirıbıeni alǵa qoıyp otyrmyz.
Degenmen, fýtbolda jalǵyz tájirıbıege senip, qamal ala almaısyz. Eýropanyń iri chempıonattarynda dop tepken myqty fýtbolshylary bar. Odan ózge máselege kelgende chehııalyqtardyń «Astanadan» asyp turǵan dáneńesi de joq. Erteńgi oıynnyń qalaı aıaqtalǵanyna qaramastan aıtarymyz osy. Iаǵnı, qazaqstandyq klýbtardyń eshteńeden shimirikpesten, mundaı qarsylastardy jeńip, Eýropada top jaratyn deńgeıge jetip qalǵany baıqalady. Bárine bastaý salatyn sondaı bir dańqty jeńis kerek.
Ermuhamed MÁÝLEN
«Egemen Qazaqstan»
Praga, Chehııa.
