– Birden aıtaıyn, komandamyzda jaraqat alǵan fýtbolshylar bar. Sondyqtan da biz osy oıynǵa tolyq qurammen shyǵa alamyz dep aıta almaımyn. Degenmen, Iаkýb Gromada men Iozef Hýshbaýer búgin jattyǵýǵa qatysty. Olardyń oıynǵa qanshalyqty daıyn ekeni erteń belgili bolady.
– Sizdiń komandańyz ishki birinshilikte súreńsiz óner kórsetip keledi. Qazir «Vıktorııadan» 14 upaıǵa qalyp kele jatyr. Sondyqtan da, Eýropa lıgasyn qurban etpeısiz be?
– Chehııa lıgasy týraly aıtatyn bolsaq, kúzgi oıyndarymyz jaqsy ótti. Al Eýropa lıgasy bizge óte mańyzdy. Biz nátıjelerimizdi odan ári jaqsarta túskimiz keledi. Sondyqtan da, erteńgi oıynda jeńiske jetip, kelesi kezeńge ótýdi kózdeımiz. Bul oıyndar chempıontattaǵy oıyndarǵa esh kedergi keltirmeıdi.
– Erteńgi oıyndy qalaı júrgizesiz? Teń nátıjeniń ózi jetkilikti ǵoı. Bálkim, birinshi mınýttan shabýylǵa shyǵýdyń qajeti joq shyǵar!?
– Teń nátıjeni ustaý úshin oınasaq qatelik bolady. Biz belsendi qımyldaýymyz kerek. Tek matchtyń sońyna qaraı teń esep saqtalyp tursa, onda biz esepti saqtaý úshin ýaqytty sozýǵa baramyz.
– Bul oıyn komandańyzdyń osy jyldyń basty oıyny dep aıta alasyz ba?
– Árıne, erteńgi nátıje bizdiń komandamyzdyń baǵasyn beredi. Biz qarsylastar týraly aıta almaımyz. «Vıktorııa» da bizdi osynshama artta qaldyrady dep oılamadyq. Endi Eýrokýbokke kóz tigemiz.
– Qytaılyq kompanııa «Slavııa» úshin úlken qarjy saldy. Alaıda, birinshilikte chempıon atana almaıtynǵa uqsaısyzdar. Sondyqtan da, maýsymnyń alǵashqy bóligi sátsiz ótti dep oılamaısyz ba?
– Biz bapkerler shtaby ótken jyly kelip chempıon atandyq. Bıyl da ekinshi oryndamyz. Bul sátsizdik emes. Onyń ústine Eýropa lıgasynda tamasha oınap júrmiz. Osynyń ózi biz úshin jetip jatyr.
– Alǵashqy oıynda oınamaǵan Dannı erteńgi oıynǵa shyǵa ma? «Astana» fýtbolshylarynan kimdi ereksheleısiz?
– Dannı erteń oınaı ma joq pa, áli ózim de bilmeımin. Onyń ornyn qazir Mırolsav Stoh alyp otyr. Al «Astana» komandasynyń fýtbolshylarynan eshkimdi erekshelemeı-aq qoıaıyn, degenmen qazaqstandyq komandanyń kúshin baıqap qaldyq. Sondyqtan da, saq bolǵymyz keledi.
– «Astana» komandasynyń oıynyn baqylaýǵa adam jibergenińiz ras pa?
– Men Mıroslav Beranekpen sóılestim. Ol buryn Qazaqstanda jumys istegendikten kóp aqparat berdi. Al «Astananyń» «Vıktorııa» Jıjkovpen ótken oıynyn ózim baryp arnaıy tamashaladym.
– «Astananyń» eýrokýboktegi sońǵy 7 golyn soqqan eki oıynshy Kabananga men Tvýmasıdi qalaı ustaýǵa tyrasyz?
– Árıne, osy eki oıynshyny qatty baǵalaımyz. Biz olardy kóp qımyldatpaýǵa tyrysamyz. Qorǵanysta bos keńistik bolmaýy tıis. Sebebi, ekeýi de jyldam ári tehnıkasy myqty aıaqdopshy. Al jalpy oıynǵa qatysty josparymdy qazir aıta almaımyn.
Ermuhammed MÁÝLEN,
«Egemen Qazaqstan»
