Atalǵan jobany júzege asyrý kenishtegi basqarý úderisin birshama ońtaılandyrady dep kútilýde. Atap aıtqanda, nysan aýmaǵynda jedel baılanys ornatyp qana qoımaı, jer astyndaǵy qurylǵylardyń aqaýlyǵy týraly naqty aqparat alýǵa múmkindik beredi. Jańa júıe, sonymen qatar, jaýapty tulǵalardy shahtadaǵy jumys barysynan qulaǵdar etip otyrady. Bul óz kezeginde tehnologııalyq úderisti úılestirip, resýrstardy tıimdi paıdalanýǵa jaǵdaı týǵyzbaq. Utqyr personal men qurylǵylardy basqarýdyń avtomatty júıesi kóptegen tehnıkalyq jabdyqtardan quralǵan. Mundaı júıeni engizýdiń negizgi maqsattarynyń biri – kenishtegi qyzmetkerlerdiń júrip-turýyn onlaın rejımde baqylaý múmkindigi. Arnaıy qural kenshi lampasynyń batareıasy men ózge qural-saımandaryna jalǵanyp, qaýipsiz radıotolqyndar arqyly adamnyń qaı jerde júrgeni týraly dálme-dál aqparat beredi.
«Biz «Kazsınk» bólimshelerin tehnıkalyq turǵydan qaıta jaraqtandyrý jónindegi is-sharalar josparyn ázirlep, qabyldap qoıdyq. Bul josparǵa jeti ınnovasııalyq joba kiredi. Olarǵa tartylatyn ınvestısııa mólsheri 12 mıllıard teńgeden asady. Onyń biri tórtinshi ónerkásiptik revolıýsııa elementterinen quralǵanyn aıta ketken jón. Iаǵnı, «Pitram» júıesi men «SIC» konsepsııalaryn engizý arqyly Maleev kenishiniń operasııalyq jumysyn avtomattandyrý. Jobanyń júzege asyrylýy 2018 jyldyń naýryz aıyna deıin aıaqtalýy tıis. Osyndaı jumystyń nátıjesinde elimiz táýelsizdigin alǵan alǵashqy jyldary iske qosylǵan zamanaýı kenishte kóp tarmaqty aqparattyq júıe paıda bolmaq. Bul óz kezeginde kenishtegi jumysty basqarý úderisin jeńildetip, nysandaǵy qaýipsizdik sharalaryn odan saıyn kúsheıte túsedi dep kútilýde. Osynyń bári sıfrlyq tehnologııalardyń arqasynda múmkin bolyp otyr», – deıdi «Kazsınk» JShS-niń bas dırektory Iýrıı Gýsev.
Azamat QASYM,
«Egemen Qazaqstan»
Shyǵys Qazaqstan oblysy
