Talaı jyldan beri sıqy ketip turǵan burynǵy balalar men jasóspirimder sport mektebiniń ǵımaraty bıyl jazda kúrdeli jóndeýden ótkizilip, aınalasy, ishi-syrty adam tanymastaı ózgertilip Dostyq úıiniń ıgiligine berildi. Nysannyń syrty saıdıngpen qaptalyp, shatyry jańalansa, tatýlyq mekeniniń aýlasyna temir qorshaýlar qoıylyp, demalatyn oryndar ázirlenip, shamdar ornatylyp, shyrsha kóshetteri otyrǵyzylypty. «Haba-Joba» JShS merdigerlik uıymynyń kúshimen júrgizilgen jóndeý jumystaryna jergilikti bıýdjetten 36 mln teńge qarjy bólinipti. Atalǵan mekeme basshysy, jas kásipker Mahambet Keshilbaev nysandy qalpyna keltirý isine úlken jaýapkershilikpen qaraǵandyqtaryn aıtady.
Jańa ǵımaratqa kóship, kóńilderi jaılanǵan Dostyq úıinde endi burynǵydaı tórt emes, jeti etnomádenı birlestik jumys isteıtin bolady. Qazaq, orys, tatar, nemis mádenı ortalyqtarynyń qataryna ýkraın, belorýs, ózbek mádenı ujymdary qosylypty. Ardagerler keńesine de jaıly ǵımarattan arnaıy bólme berilipti.
«Kópultty elimizdegi tatýlyq pen birliktiń bir belgisi osy Dostyq úıleri dep bilemin. Bizdiń aýdanymyzda Dostyq úıi ótken jyly 1-mamyrda ashylǵan edi. Jańa ǵımarat etnosaralyq beıbitshilik pen kelisimdi odan ári nyǵaıtýǵa úles qosatynyna kúmánimiz joq. Endi aýdannyń etnomádenı ortalyqtarynyń zamanaýı jáne kópfýnksıonaldy mádenı ortalyǵy bar. Munda turǵyndar óz tilderin úırenip, ózgelerge óz salt-dástúrleri jaıynda maǵlumat bere alady», – dedi Katonqaraǵaı aýdanynyń ákimi Ahmetqalı Nurǵojın jańa ǵımarattyń ashylý saltanatynda.
Azamat QASYM,
«Egemen Qazaqstan»
Shyǵys Qazaqstan oblysy,
Katonqaraǵaı aýdany
