«Nur Otan» partııasy oblystyq fılıalynda ótken partııalyq tyńdaý barysynda «Nurly jol» memlekettik baǵdarlamasynyń oryndalýy basty taqyryp arqaýyna aınalyp, Energetıka jáne turǵyn úı-kommýnaldyq sharýashylyq basqarmasy basshysynyń orynbasary Ádilbek Áýbákirovtiń esebi tyńdaldy. Ol óz sózinde baǵdarlama sheńberinde 10 joba qolǵa alynǵanyn, oǵan 6 mıllıard teńge qarajat qarastyrylǵanyn, josparly jumystardyń 68 paıyzy ıgerilgenin aıta kelip, 2020 jylǵa qaraı tozyǵy jetken sýmen jáne jylýmen qamtý jelileri retke keltiriletinin jetkizdi. Oblystyq máslıhattyń depýtaty Sergeı Tımofeevti onyń málimdemesi qanaǵattandyrmasa kerek, ol áńgimeni qatqyl bastady. Alaıda, oblys turǵyndarynyń ınfraqurylym jumystaryn atqaratyn merdigerlerge kóńilderi tolmaıdy. Ásirese sapa jaıyna qatysty shaǵymdar az emes.
Qubyrlar jóndelgen soń joldar men kósheler nege túzelmeıdi degen suraǵyna naqty jaýap berilmedi. Keıbir kósheler birneshe jyldan beri oıdym-oıdym qalpynda tur. Mashaqatyn sol mańaıdaǵy adamdar tartyp júr. Tıisti oryndar synnan tıisti qorytyndy shyǵarýdyń ornyna kináni ózgelerge aýdarýǵa áýes. Á. Áýbákirovke grafık boıynsha júzege asyrylatyn jóndeý sharalarynyń tizbesin jasaý, qatań baqylaýdy shıratý mindetteldi.
«QazAvtoJol» UK» AQ oblystyq bólimshesiniń jetekshisi Bolatbek Aıtbaev «Kóliktik-logıstıkalyq ınfraqurylymdy damytý» baǵdarlamasyn baıandap, aýqymdy úsh jobanyń biregeıi retinde «Astana-Petropavl-Qorǵan» tranzıttik dálizin atady. Bul maqsat úshin el qazynasynan qomaqty qarjy bólinip, jańa tehnologııa qoldanylýda. Aldaǵy úsh jyl ishinde 6,7 myń shaqyrym avtomobıl joldaryn salý, qalpyna keltirý belgilengen. Buqar jyraý kóshesindegi ótpeli kópirdiń kelesi jyly iske qosylatyny belgili boldy.
Partııalyq tyńdaýda aýyr júk kólikteriniń qozǵalysyna baqylaý ornatý tapsyryldy.
О́mir ESQALI,
«Egemen Qazaqstan»
Soltústik Qazaqstan oblysy
