Bir ereksheligi, qalqamandyqtardyń túgelge derligi jumyspen qamtylǵan. О́ıtkeni óndiristik qalany aınala ornalasqan úlkendi-kishili zaýyttar men aýyl sharýashylyǵy salasy boıynsha kókónis ósirýge arnalǵan egistik tanaptary jumys kúshine úlken suranys týdyrady. Sondyqtan bul aýyl turǵyndary tek áleýmettik nysandardyń jetkiliksizdigine ǵana nazar aýdaratyn. Osy olqylyqtyń orny birtindep tolyp keledi. Taıaýda Qalqaman aýylynda 20 jyl boıy qańyrap bos turǵan ǵımarat jóndeýden ótti. Jóndeý jumystaryna oblystyq bıýdjetten 100 mıllıon teńge bólindi. Jaýapty merdiger kompanııa qurylys jumystaryn jospar boıynsha júrgizip, ýaqytynda paıdalanýǵa berdi. Qazir jańa ǵımaratta aýyldyq emhana turǵyndarǵa medısınalyq qyzmet kórsetýde.
Qalalyq ortalyq aýrýhana dırektorynyń mindetin atqarýshy Baqytjamal Nuraldınovanyń aıtýynsha, emhanada alǵashqy medısınalyq járdem, terapevt, fızıoterapııa, qan alý, hımızator, ekpe salý, akýsher, em-shara jáne kúndizgi emdeý stasıonaryna arnalǵan kabınetter bar. Jedel járdem brıgadasy da táýlik boıy jumys isteıdi. Tipti EKG júıesi boıynsha oblys ortalyǵyndaǵy kardıologtarǵa onlaın-rejimde aqparat jiberip, qorytyndy da ala alady. Sonyń nátıjesinde naýqasqa der kezinde kómek kórsetýge múmkindik bar. Sonymen birge jýyrda Evgenevka aýylynda da jańa dárigerlik ambýlatorııa ashyldy. Bul nysannyń qurylysyna oblystyq bıýdjetten 147 mıllıon teńge qarajat bólingen eken. Qurylys jumystaryn jergilikti «Stalmontaj» JShS júrgizdi. Aýyl turǵyny Rymkesh Shapaǵatqyzymen sóıleskenimizde, ol dárigerlik emhananyń salynýyn turǵyndardyń kópten kútkenin, ondaǵy kúndizgi stasıonardyń qolaıly ekenin, sonymen birge jasóspirimderge arnalǵan sport kesheniniń paıdalanýǵa berilýi de aýylǵa aıryqsha kóńil bólinip otyrǵanyn baıqatatynyn jetkizdi.
Farıda BYQAI,
«Egemen Qazaqstan»
Pavlodar oblysy,
Aqsý qalasy
