Qoǵamdyq densaýlyq saqtaý komıtetinde qurylǵan jumys toby bıylǵy mamyr aıynan bastap 66 sanıtarlyq talapqa arnaıy revızııa júrgizip, 29 erejeni qoldanystan alyp tastaǵan. Taǵy 29 sanıtarlyq qadaǵalaý normasyna ózgerister engizgen. Bul ózgeristerdiń kóbi bıznesti damytýǵa qolaıly jaǵdaı jasaý, kedergilerdi azaıtý maqsatynda týyndap otyr. «Densaýlyq saqtaý nysandaryna arnalǵan 34 tarmaq eskirdi dep tanylyp, qoldanystan alyndy. Buǵan qosa 12 tarmaq yryqtandyrý maqsatynda qaıta qaraldy. Osylaısha, sanıtarlyq talaptardy ońtaılandyrý medısınalyq nysandar qurylysyn turǵyzýǵa ketetin shyǵyndardy 30 paıyzǵa qysqartty. Sondaı-aq jer telimi aýqymyn 30-50 paıyzǵa azaıtýǵa múmkindik berdi. Onyń syrtynda zerthanalardy qadaǵalaý talaptaryna da ózgerister engizildi», dedi B.Shárip.
Sanıtarlyq talaptarǵa engizilgen ózgeristerge sáıkes, bıyldan bastap sýpermarketter, iri saýda núkteleri erekshe tekserilýge jatatyn nysandar tiziminen alyndy. Osy nysan aýmaǵynda ornalasqan kondıterlik sehtar, naýbaıhana da jeke tekserilý nysany bolyp eseptelmeıdi. Buryn bul óndiris oshaqtary sanıtarlyq-epıdemıologııalyq qadaǵalaý mamandary tarapynan jylyna bir ret mindetti túrde tekserilip kelgen. «Atalǵan obektiler buryn erekshe tekseristen ótetin. Al qazir jańa talaptarǵa sáıkes olar «qaýpi joǵary» nysandar qatarynan «qaýpi tómen» obektilerge ótti. Demek, sýpermarketter burynǵydaı jıi tekserilmeıdi. Al eger onda paıdalaný merzimi ótken ónimder satylǵan jaǵdaı tirkelse nemese tutynýshylar tarapynan aryz-shaǵymdar tússe, sonda ǵana tekseriledi ári saýda oryndary kemshilikterdi joıǵanǵa deıin aıryqsha tekseriletin aýmaqqa kiredi», dedi B.Shárip.
Ol, sondaı-aq Qazaqstanda medısınalyq uıymdardyń qyzmet kórsetý sapasyna da aryz-shaǵymdar az emestigin aıtty. Qalalar men óńirlerde qurylǵan call-ortalyqtarǵa kelip túsetin qońyraýlardyń 90 paıyzdan astamy anyqtamalyq sıpatta bolsa, kebireýi shaǵym retinde de tirkeledi. Olardyń 40 paıyzy dáleldenip, tıisti sharalar qoldanylady eken.
Sanıtarlyq-epıdemıologııalyq qadaǵalaý mamandary jurtshylyqtyń aryz-shaǵymy boıynsha medısınalyq uıymdardy da tekseredi. Emdelýshiniń quqy erekshe buzylǵan jaǵdaı anyqtalsa, onda materıal jergilikti ishki ister organyna jiberiledi nemese sol mekeme ákimshilik jaýapkershilikke tartylady.
Qymbat TOQTAMURAT,
«Egemen Qazaqstan»
